له پېښو سره د مبارزې آمادګۍ ملي ادارې د کارکوونکو لپاره د ظرفیت لوړولو روزنیز پروګرام ترسره شو
نن سهار یکشنبه, له پېښو سره د مبارزې آمادګۍ ملي ادارې د لوی رئیس, محترم الحاج ملا نورالدین ترابي په لارښوونه, د کارکوونکو چارو ریاست له لوري د دې ادارې د کارکوونکو لپاره په اداري چارو کې د ظرفیت لوړولو روزنیز پروګرام د دې ادارې د غونډو په تالار کې ترسره شو.
دا روزنیز پروګرام، په بېلابېلو اداري برخو لکه، پلان جوړونې، د اجرااتو د ارزونې او نورو اړوندو برخو کې د کارکوونکو د مسلکي وړتیاوو د پیاوړتیا په موخه ترسره شو او د یادې ادارې رئیسانو, آمرینو او کارکوونکو ګډون په کې وکړ.
د پروګرام په پیل کې د کارکوونکو چارو ریاست د ادارې د پراختیا او روزنې آمر, محترم نورآغا صاحب زاده د ظرفیت لوړولو لپاره د روزنیزو پروګرامونو د اهمیت په اړه خبرې وکړې او ویې ویل، چې دا پروګرام به څو پړاوونه ولري او د ادارې د کارپوهانو له لوري به په بېلابېلو برخو کې معلومات شریک او پریزنټېشنونه وړاندې شي.
ورپسې د کړنو د ارزونې لوی مدیر، محترم محمد رفیع ساحل ګډونوالو ته د پلان جوړونې، د کړنو د ارزونې، د دندو د لایحې او نورو اړوندو موضوعاتو په اړه هر اړخیز پریزنټېشن وړاندې کړ.
نېټه: ۱۴۴۷/۳/۲۱ هـ ق
له پېښو سره د مبارزې آمادګۍ ملي اداره
