د کاپیسا، پنجشېر او پروان ولایتونو له پېښو سره د مبارزې آمادګۍ ریاستونو د کارکوونکو لپاره بشردوستانه مرستو ته د لاسرسي او خوندیتوب په اړه دوه ورځنی ورکشاپ ترسره شو
بشردوستانه مرستو ته د لاسرسي او خوندیتوب د څو اړخیزه ورکشاپ تر سرلیک لاندې دوه ورځنی روزنیز ورکشاپ چې له پېښو سره د مبارزې آمادګۍ ملي ادارې لخوا د جنیوا کال مؤسسې او د پروان ولایت له پېښو سره د مبارزې آمادګۍ ریاست په همکارۍ ترسره شوی و، تېره ورځ چهارشنبه پای ته ورسېد.
د پروان ولایت والي، محترم مفتي محمد ادریس انوري، د پروګرام د پای په مراسمو کې وویل چې اسلامي احکام، قوانین او اصول د بشر د خوندیتوب پر بنسټ ولاړ دی، موږ مسلمانان مسؤول یو چې د اسلامي ارشاداتو سره سم عمل وکړو او د خلکو د ژوند د ښه والي لپاره هڅه وکړو.
په دې پروګرام کې، له پېښو سره د مبارزې آمادګۍ ملي ادارې د نړیوالو اړیکو رئیس، مولوي عبدالرحمن رحماني، د مرستو د رسولو په بهیر کې د همغږۍ پر اهمیت ټینګار وکړ او ویې ویل چې بشردوستانه مرستې ملي حیثیت لري او د دې ادارې مسؤولیت د مرستو عادلانه وېش او د همغږۍ رامنځته کول دی.
همدارنګه د جنیوا کال د مؤسسې استازي، محمد خوشحال نصرت، د سیمهییزو مسؤولینو له همکارۍ څخه د قدردانۍ ترڅنګ وویل چې دا مؤسسه په ۱۷ ولایتونو کې فعالیت لري او له سیمه ییزو ادارو او د مرستو وېشونکو بنسټونو سره همکاري د مرستو د رسولو په بهیر کې ځانګړی اهمیت لري.
د یادونې وړ ده، چې په دې ورکشاپ کې سیمه ییزو مسؤلینو، د همکارو مؤسسو استازو او د پروان، پنجشېر او کاپیسا ولایتونو له پېښو سره د مبارزې آمادګۍ ریاستونو کارکوونکو ګډون کړی و.
نیټه: ۱۴۴۷/۰۳/۲۵ هـ ق
له پېښو سره د مبارزې آمادګۍ ملي اداره
