د فراه ولایت په بالابلوک ولسوالۍ کې اته فیره مرمۍ کشف او خنثی شوې
د فراه ولایت له پېښو سره د مبارزې آمادګۍ ریاست، د ډنمارک د کډوالو شورا (DRC) دفتر د ماینپاکۍ څانګې په تخنیکي همکارۍ، د دغه ولایت د بالابلوک ولسوالۍ اړوند د ګنجآباد په کلي کې اته فیره ۱۲۲ مليمتري WP ART مرمۍ وموندلې او په خوندي ډول یې خنثی کړې.
د فراه ولایت له پېښو سره د مبارزې آمادګۍ ریاست مسؤلینو له سیمهییزو اوسېدونکو وغوښتل، چې د هر ډول مشکوک شي د لیدلو په صورت کې هغه ته د نږدې کېدو او لمس کولو څخه په کلکه ډډه وکړي او د موضوع په اړه ژر تر ژره اړوندو مسؤلو ادارو ته خبر ورکړي.
د یاد ریاست مسؤلین زیاتوي، چې د فراه ولایت په کچه د ناچاوده توکو د پېژندنې، پاکولو او خنثی کولو بهیر په دوامداره ډول روان دی. دغه ریاست له همکارو بنسټونو سره په همغږۍ هڅه کوي، چې د جګړې د پاتې شونو له امله رامنځته کېدونکي خطرونه راکم او د هېوادوالو لپاره د لا خوندي ژوند زمینه برابره کړي.
