د ننګرهار ولایت په مرکز او بېلابېلو ولسوالیو کې چاودېدونکي توکي کشف او خنثی شول
د ننګرهار ولایت له پېښو سره د مبارزې آمادګۍ ریاست په همغږۍ د AREA ماین پاکۍ مؤسسې د بېړني ځواب ویونکي ټیم، د یاد ولایت د مرکز په امنیې قوماندانۍ، د دوربابا ولسوالۍ په څڅوبي کلي، د خوګیاڼي ولسوالۍ په ګارو چینې کلي او د شېرزاد ولسوالۍ په مرکي خېلو کلي کې د ناچاوده توکو د کشف او خنثی کولو بریالي عملیات ترسره کړل.
د عملیاتو په ترڅ کې، ۴ ضربې د ۱۵۴ میلي متري توپ مرمۍ، ۲ ضربې د هاوان مرمۍ، ۲ کړۍ په لاس جوړ شوي ماینونه، ۲ په لاس جوړ شوي فیوزونه او ۱ په لاس جوړ شوی ماین کشف او د تخنیکي کړنلارې له مخې خنثی او له منځه یووړل شول.
له پېښو سره د مبارزې آمادګۍ ریاست مسؤلینو وویل، چې د دغو عملیاتو موخه د ملکي وګړو د ژوند خوندیتوب، د احتمالي پېښو مخنیوی او د سیمې د امنیت ټینګښت دی.
