د بامیان له پېښو سره د مبارزې آمادګۍ ریاست په پنجاب ولسوالۍ کې د سېلابي لارې پاکولو د پروژې کار پیل کړ
له پېښو سره د مبارزې آمادګۍ ادارې د لوی رئیس محترم الحاج ملا نورالدین ترابي د لارښوونې پر بنسټ، د بامیان ولایت له پېښو سره د مبارزې آمادګۍ ریاست، د سېلابونو له خطرونو څخه د زیانونو د کمولو او د خلکو د ځان او مال د ساتنې په موخه، د یاد ولایت په پنجاب ولسوالۍ کې د یوې سېلابي لارې د پاکولو چارې پیل کړې.
د دې پروژې موخه د سطحي اوبو د بهېدو لپاره د مناسبې لارې رامنځته کول او د سېلابي اوبو خوندي لېږدول دي، څو د استوګنیزو کورونو، کرنیزو ځمکو، بڼونو او عامه تأسیساتو ته د زیان رسېدو مخه ونیول شي.
د دې پروژې په بشپړېدو سره به شاوخوا له ۱۰۰۰ تر ۱۵۰۰ کورنۍ د سېلابونو له خطرونو څخه خوندي شي او سلګونه جریبه کرنیزې ځمکې، بڼونه او د سیمې زیربناوې به هم د سېلابونو له احتمالي زیانونو څخه وساتل شي.
د سیمې اوسېدونکو د دې پروژې له پیل څخه هرکلی وکړ او دا یې د سېلابونو د خطرونو د کمولو، د خلکو د شتمنیو د ساتنې او د سیمې د اوسېدونکو لپاره د خوندیتوب رامنځته کولو په برخه کې اغېزناک ګام وباله.
