په افغانستان کې د جینوا کال موسسې عمومي رییس سره د پېښو ته د رسېدو په چارو کې د دولت وزارت مرستیال لیدنه
کابل- د کب ۱۹مه ۱۴۰۰
محترم مولوي شرف الدین مسلم د پېښو ته د رسېدو په چارو کې د دولت وزارت مرستیال، نن سهار له مېرمن فریانه فدایي په افغانستان کې د جینوا کال موسسې عمومي رییس سره د دې وزارت په انګړ کې ولیدل او پر ګډو کاري پلانونو یې خبرې وکړې.
په دې لیدنه کې، لومړۍ په افغانستان کې د جینوا کال موسسې عمومي رییس، د دې موسسې د کړنو او پروګرامونو په اړه وویل چې جینوا کال یو بشردوستانه سازمان ده چې په بېلابېلو ټولنو کې په وسله والو نښتو کې د غیرنظامیانو د ساتلو لپاره کار کوي.
هغې زیاته کړه چې د غیر دولتي وسله والو ډلو لخوا د جګړې حقونو ته درناوي کولو او د ځان د دفاع لپاره د ځایی ټولنو د هڅو څخه ملاتړ کوي.
مېرمن فدایي وویل چې دې موسسې په کابل، ننګرهار، کونړ، کندهار او بامیان ولایتونو کې پر دغو موخو باندې په تمرکز سره فعالیت کړئ او هڅه کوي چې دغه پروګرام تر نورو ولایتونو پورې وغځوي.
ورته مهال د پېښو ته د رسېدو په چارو کې د دولت وزارت مرستیال، دې وزارت ته د راتګ او په افغانستان کې د دغې موسسې د کړنو ترسره کولو په پار له مېرمن فدایي څخه د مننې کولو سره زیاته کړه چې په افغانستان کې د امنیت په ټینګېدو او د بشري مرستو په شفافه او عادلانه توګه وېش په پام کې نیولو سره د ډونرونو لخوا دې بشري مرستې زیاتې شي او موږ له تاسو غواړو چې په دې برخه کې ډونرونه وهڅوئ.
سربېره پر دې، مولوي شرف الدین مسلم وویل چې اړتیا ده ترڅو هم په افغانستان او هم په جینوا کې د غیر نظامیانو پر ساتلو باندې د انسان دوستانه اغیزو رامېنځته کولو لپاره د ظرفیت لوړولو او د پوهې د کچې د لوړولو په پار کنفرانسونه او ورکشاپونه په لار واچول شي ترڅو د احتمالي بحرانونو په وخت کې له هغوۍ څخه ساتنه وشي. هغه زیاته کړه چې ماشومان د نښتو د اغیزو پر وړاندې ډېر زیانمنونکي دي او اړتیا ده ترڅو د هغوۍ لپاره په بېلابیلو اړونده برخو کې د پوهاوي ورکولو پروګرامونه ترسره شي.
په پای کې دواړو خواوو پر راتلونکو ګډو کارونو باندې تینګار وکړ او د جینوا کال موسسې رییس وویل چې دغې موسسې خپل د پوهاوي ورکولو پلان چمتو کړۍ او دی وزارت ته به یې واستوي ترڅو د دې ادارې لخواد د دغه پروګرام د پلي کېدو په پار لازم نظرونه او وړاندیزونه وړاندې شي.
