د وروستۍ زلزلې زیانمن شویو ته د رسېدو په پار د ترکمنستان جمهوریت د بشري مرستو ۲۰ ټنۍ جوپه کابل ته راورسېده
کابل- د چنګاښ ۴مه-۱۴۰۱
د ترکمنستان جمهوریت نن سهار، د یاد هېواد ۲۰ ټنه خوراکي، غیرخوراکي او لومړنۍ مرستې په خوست او پکتیکا ولایتونو کې د وروستۍ زلزلې څخه زیانمن شویو ته د رسېدو لپاره د کابل نړیوال هوایي ډګر له لارې د افغانستان سره مرسته وکړه.
د دې مرستو د سپارلو په پروګرام کې مولوي محمد نسیم حقاني د دغه وزارت د اطلاعاتو او عامه اړیکو رییس د افغانستان لپاره د ترکمنستان جمهوریت بشري مرستې مهمې وګڼلې او وویل: موږ به دغه مرستې د پکتیکا ولایت برمل او ګیان او د خوست ولایت د سپېرې ولسوالیو د زلزلې له امله زیانمن شویو ته په شفافه توګه ووېشو.
ورپسې خواجه عوضزوف په کابل کې مېشت د ترکمنستان جمهوریت سفیر، زیانمن شویو سره د خواخوږۍ په څرګندولو سره وویل: د ترکمنستان هېواد د وروستۍ زلزلې له امله زیانمن شویو لپاره خوراکي، غیرخوراکي او لومړنۍ مرستې د ا.ا.ا سره مرسته کړې. نوموړي زیاته کړه چې دغه مرستې بسنه نکوي او په راتلونکي کې به د افغانستان خلکو سره لا زیاتې مرستې ترسره شي.
