په هلمند ولایت کې له سیلاب ځپلو سره نغدي مرستې ترسره شوې
لښکرګاه _ د غویي 10مه-1403
محترم مولوي عبدالرحمن زاهد پېښو ته د رسېدو په چارو کې د دولت وزارت د مالي او اداري عمومي رییس او سرپرست د بیړنیو عملیاتو د مرکز له رئیس محترم قاري محمد خوشحال زماني او د پېښو چارو کارپوه سید محمد صدام سره یو ځای د وارثانو د درملنې او مرستې په موخه د وروستیو سیلابونو له امله د شهیدانو او ټپیانو د لیدو لپاره هلمند ولایت ته سفر وکړ.
پېښو ته د رسېدو په چارو کې د دولت وزارت سرپرست د یاد ولایت طبیعي پېښو پر وړاندې د چمتووالي رئیس الحاج مولوي جمعه خان مستقیم او ورسره ملګري پلاوي د هلمند ولایت له مرستیال والي مولوي محمد نبي حمایت اخندزاده سره وکتل.
په دې کتنه کې مولوي صاحب زاهد کندهار او اروزګان ولایتونو ته د خپل سفر د پرمختګ یادونه وکړه او ویې ویل، چې د ا.ا.ا د خلکو ستونزې په پام کې لري او خپلو هڅو ته به دوام ورکړي ترڅو په راتلونکې کې د دغه ډول پېښو خطرونو مخنیوۍ وشي.
د يادونې وړ ده، چې نن د لښکرګاه ښار په نادعلي، مارجې، خانشين، ګرمسېر او بېلابېلو سيمو کې د زيانمنو شويو لسو شهيدانو پر وارثانو او اتو ټپيانو نغدي مرستې ووېشل شوې.
