د ننګرهار ولایت له پېښو سره د مبارزې آمادګۍ ریاست ۲۰۰ زلزله ځپلو کورنیو ته نغدي او غیرخوراکي مرستې وویشلې
له پېښو سره د مبارزې آمادګۍ ملي ادارې او د ماشومانو د ساتنې موسسې (Save The Children) ترمنځ د لاسلیک شوي هوکړه لیک له مخې، د ننګرهار ولایت له پېښو سره د مبارزې آمادګۍ ریاست د یادې مؤسسې په مالي او تخنیکي همکارۍ، د دې ولایت د دره نور ولسوالۍ په شیمل، کندک، وایګل او کشموند قلعه کلیو کې د زلزلې له امله ۲۰۰ زیانمنو کورنیو ته د ماشومانو د خوندیتوب، خوړو او ژمنۍ جامو د برابرولو لپاره له سروې ووسته نغدي او غیرخوراکي مرستې ووېشلې.
په دې لړۍ کې، د مسوولینو په شتون کې، له یاد شمېر کورنیو څخه ۵۶ کورنیو هرې یوې ته ۹,۸۰۰ افغانۍ ووېشل شوې، چې ټولټال پنځه سوه اته څلوېښت زره او اته سوه (۵۴۸,۸۰۰) افغانۍ نغدې پیسې د یاد شمېر کورنیو لپاره ځانګړې شوې وې. همدارنګه ۱۴۴ کورنیو هرې یوې ته ۴ تختې یو کسیزه کمپلې، یوه تخته دوه کسیزه کمپله، ۶ جوړه د ماشومانو او لویانو لپاره ژمني بوټان، ۱۲ عدده ښځینه او نارینه جاکټونه، ۱۲ جوړه جرابې، ۴ جوړه دستکشونه، ۲ عدده ښځینه شال، ۲ عدده نارینه پټو، ۲ عدده بکسونه او ۲ عدده ژمنۍ خولۍ ووېشل شوې.
مرسته اخیستونکو کورنیو د مرستو په ترلاسه کولو سره خوښي څرګنده کړه او له پېښو سره د مبارزې آمادګۍ ریاست او د ماشومانو د ملاتړ موسسه څخه یې مننه او قدرداني وکړه.
نېټه:۱۴۴۷/۶/۱۹ هـ ق
له پېښو سره د مبارزې آمادګۍ ملي اداره
