د میدان وردګ ولایت له پېښو سره د مبارزې آمادګۍ ریاست په نرخ ولسوالۍ کې د یوه پل د ترمیم او بیارغونې کار پیل کړ
له پېښو سره د مبارزې آمادګۍ ادارې د لوی رئیس، محترم الحاج ملا نورالدین ترابي، د لارښوونې پر بنسټ، د میدان وردګ ولایت له پېښو سره د مبارزې آمادګۍ ریاست د یاد ولایت د نرخ ولسوالۍ د سرهپله په سیمه کې د سور پل د ترمیم او بیارغونې کار رسمآ پیل کړ.
یاد پل د وروستیو سېلابونو له امله زیانمن شوی و، چې له امله یې د سیمې د اوسېدونکو تګ راتګ له جدي ستونزو سره مخ شوی او پر ورځنیو چارو یې منفي اغېز کړی و.
د دې پروژې د پلي کولو موخه د پل د زیانمنو شویو برخو ترمیم، د خلکو لپاره د تګ راتګ آسانتیا برابرول او د سیمې د ټرانسپورټي وضعیت ښه کول دي. د دې پروژې په بشپړېدو سره به مواصلاتي لارو ته د اوسېدونکو لاسرسی ښه شي او د سیمې د ټرانسپورټي ستونزو لویه برخه به هواره شي.
د میدان وردګ ولایت له پېښو سره د مبارزې آمادګۍ رئیس، مولوي احمدشاه ذهین، د دې پروژې د پرانیستې په مراسمو کې وویل، چې یاد ریاست هڅه کوي د قدرتي پېښو له امله د رامنځته شویو زیانونو د جبران او بیارغونې ورته پروژې د دغه ولایت په نورو ولسوالیو کې هم پلې کړي، ترڅو د خطرونو د کمېدو او د خلکو اړتیاوو ته د لا ښه رسېدنې زمینه برابره شي.
