پکتيا ولايت کې د سیلابونو له امله ۱۴ زیانمنو کورنیو سره مرسته وشوه
پکتيا ولايت کې د بارانونو له امله د سیلابونو په وجه ۱۴ زیانمنو کورنیو سره د پېښو پر وړاندې مبارزې ریاست لخوا د خوراکي توکو, د کډوالۍ نړيوال سازمان IOM له لوري د غیر خوراکي توکو مرسته ترسره شوه.
ذکر شوي کورنۍ د پکتيا مرکز ګردیز، وزي ځدراڼ او میرزکې ولسواليو کې د بارانونو او سیلابونو له امله زیانمن شوي وې هرې کورنۍ ته د پېښو پر وړاندې مبارزې رياست له لوري اوړه، لوبيا، چای، بوره او غوړي ورکړل شول، د کډوالۍ نړيوال سازمان IOM له لوري د غیر خوراکي توکو بسته، د بېړنۍ سرپټونې بسته، کمپلې او د یو باب خیمې مرسته ترسره شوه.
د وېش پدې مراسمو د پېښو پر وړاندې مبارزې رئیس محترم شادیم خان هلال او د کډوالۍ نړیوال سازمان د سوېل ختيځ زون مسول محترم اسحاق افغان ګډون درلود.
د يادونې وړ ده چې پورته ذکر شويو کورنيو ته د توکو وېش د اړوندو ادارو استازو او د توزیع په موخه د ټاکل شوي هيئت په حضور کې په زیانمنو کورنیو باندې وویشل شول.
