د روسیې فدراسیون لخوا د ۲۰ ټنه خوراکي موادو لومړۍ برخه له پېښو سره د مبارزې ملي ادارې لوی رئیس ته تسلیم شوه
نن ورځ، جمعه، د روسیې فدراسیون لخوا د ۲۰ ټنه خوراکي موادو لومړۍ برخه له پېښو سره د مبارزې آمادګۍ ملي ادارې لوی رئیس ته تسلیم شوه. دغه مرسته د وروستیو زلزلو له امله زیانمنو شویو کسانو لپاره ځانګړې شوې ده او په عادلانه توګه به پر هغوی ووېشل شي.
د دې مرستو د تسلیمۍ په غونډې کې له پېښو سره د مبارزې آمادګۍ ملي ادارې لوی رئیس، الحاج ملا نورالدین ترابي، د کلیو پراختیا او بیا رغونې معین، مولوي شرفالدین مسلم ، د موادو دتسلیمی ټاکلی کیمتی اعضاء او د روسیې فدراسیون سفیر ګډون درلود.
د دغه غونډې پر مهال دواړو لوریو د مرستو پر اهمیت، د افغان ولس د اړتیاوو پر درک، او د دواړو خواوو ترمنځ د همکاریو پر لا پراختیا ټینګار وکړ.
ښاغلي ترابي صاحب د روسیې فدراسیون څخه د زړه له کومي مننه وکړه او دغه مرسته یې د افغان ولس لپاره، په تېره بیا د زلزله ځپلو کسانو د ستونزو په کمولو کې یو مهم ګام وباله. نوموړي ژمنه وکړه چې دا مرستي به د وروستیو زلزلو له امله زیانمنو شویو کسانو ته په شفافه او عادلانه توګه ووېشل شي.
همداراز، د روسیې فدراسیون ژمنه وکړه چې ۲۰ ټنه نور خوراکي مواد به هم په نږدې راتلونکي کې راواستول شي، چې هغه به هم د زلزله ځپلو کسانو د اړتیاوو پوره کولو لپاره ووېشل شي.
نېټه: ۱۴۴۷/۰۳/۱۲ هـ ق
له پېښو سره د مبارزې آمادګۍ ملي اداره
