د سمنګان ولایت په مرکز کې د کیبلي پل استنادي دېوال بشپړ او پرانیستل شو
د سمنګان ولایت د مرکز په آسیاب عرب سیمه کې د کیبلي پل استنادي دېوال، چې د سېلاب له امله ویجاړ شوی و، د ساختماني کارونو تر بشپړېدو وروسته رسمآ پرانیست او ګټې اخیستنې ته وسپارل شو.
یاده پروژه له پېښو سره د مبارزې آمادګۍ ملي ادارې له بودجې څخه د اته سوه نه شپېته زره او اته سوه شپږ نوي (۸۶۹,۸۹۶) افغانیو په لګښت پلې او په معیاري ډول جوړه شوې ده.
د دې پروژې د پرانېستې په مراسمو کې د سمنګان ولایت له پېښو سره د مبارزې آمادګۍ رئیس, مولوي احسان الله احسان، د ولایت مقام استازي، قومي مشرانو، سپینږیرو او د سیمې اوسېدونکو شتون درلود.
د سیمې اوسېدونکو د پروژې د بشپړېدو له امله د خوښۍ د څرګندولو ترڅنګ، د افغانستان د اسلامي امارت له مشرتابه، له پېښو سره د مبارزې آمادګۍ ملي ادارې او په ځانګړي ډول د سمنګان ولایت له پېښو سره د مبارزې آمادګۍ ریاست څخه مننه وکړه او دا اقدام یې د ترانسپورتي وضعیت په ښه والي او د عامه هوساینې لپاره اغېزناک وباله.
مراسم د خیر په دعا سره پای ته ورسېدل.
نېټه: ۱۴۴۷/۲/۲۶
له پېښو سره د مبارزې آمادګۍ ملي اداره
