د قزاقستان هېواد ۳.۵ ټنه درمل او لومړنۍ روغتیایي مرستې له پېښو سره د مبارزې آمادګۍ ملي ادارې ته وسپارلې

نن ورځ دوشنبه، د قزاقستان هېواد ۳.۵ ټنه درمل او لومړنۍ روغتیایي مرستې د کابل د نړیوال هوایي ډګر له لارې له پېښو سره د مبارزې آمادګۍ ملي ادارې ته وسپارلې. 
د دغو مرستو د سپارلو په مراسمو کې، د قزاقستان د لومړي وزیر مرستیال سریک ژومانګرین، له پېښو سره د مبارزې آمادګۍ ملي ادارې معین، محترم الحاج ملا عبدالولي څارنوال (حاجي وارث)، د یادي ادارې د مالي او اداري لوی رئیس، مولوي محمد عالم علمیار، د نړیوالو اړیکو رئیس، مولوي عبدالرحمن او یو شمېر لوړپوړو امارتي چارواکو او د رسنیو استازو شتون درلود.
محترم الحاج ملا عبدالولي څارنوال د قزاقستان له بشردوستانه مرستو څخه د مننې ترڅنګ ټینګار وکړ، چې دا مرستې به د بیړنیو حالاتو پر مهال د اړتیاوو له مخې زیانمنو ته ووېشل شي. نوموړي زیاته کړه چې تېره اوونۍ هم د قزاقستان هېواد ۳۶ واګونه خوراکي او غیرخوراکي مرستې د حیرتان بندر له لارې له پېښو سره د مبارزې آمادګۍ ملي ادارې ته رالېږلې وې.
د قزاقستان د لومړي وزیر مرستیال، سریک ژومانګرین، په خپله وینا کې وویل، چې نن مو ۳.۵ ټنه درمل او لومړنۍ روغتیایي مرستې د افغانستان له خلکو سره وکړې او تېره اوونۍ مو هم ۳۶ واګونه خوراکي او غیرخوراکي مرستې رالېږلې وې، او دا لړۍ به په راتلونکې کې هم دوام ومومي.
په پای کې، له پېښو سره د مبارزې آمادګۍ ملي ادارې معین یو ځل بیا د قزاقستان له بشردوستانه همکاریو څخه د مننې ترڅنګ، د دواړو هېوادونو ترمنځ د اقتصادي، سوداګریزو او پانګونې په برخو کې د همکاریو د پراختیا هیله څرګنده کړه.

نېټه:۱۴۴۶/۱۰/۲۳ هــ ق
له پېښو سره د مبارزې آمادګۍ ملي اداره