د لغمان ولایت په علینګار ولسوالۍ کې د دې ادارې لخوا د استنادي دېوال د جوړېدو کار له بشپړېدو وروسته ګټې اخېستنې ته وسپارل شو
د لغمان ولایت له پېښو سره د مبارزې آمادګۍ ریاست، د علینګار ولسوالۍ په محمد افضل بېله سیمه کې د ۴۹ متره په اوږدوالي استنادي دېوال رسماً ګټې اخیستنې ته وسپاره.
دا پروژه د سېلابونو د خطرونو کمولو، د هستوګنیزو کورونو او د کرنیزو ځمکو د ساتنې په موخه د ۱ میلیون افغانیو په لګښت، د عالیقدر امیرالمؤمنین حفظ الله د حکم پر بنسټ، له پېښو سره د مبارزې آمادګۍ ملي ادارې له لوري تمویل او د قراردادي شرکت لخوا بشپړه شوه.
د استنادي دیوال د پرانستې په مراسمو کې د لغمان ولايت له پېښو سره د مبارزې آمادګۍ رئيس محترم قاري خير محمد غازي، د لغمان ولايت د مقام د دفتر رئيس قاري شکرالله کاوون، د علینګار ولسوال قاري نورالهادي صارم, د یاد رياست مسؤلینو, د کلي ملکانو او سیمه ییزو اوسېدونکو شتون درلود.
د مراسمو پر مهال، مسؤلینو د ځایي زیربناوو د پیاوړتیا او د طبیعي پېښو پر وړاندې د ټولنې د زغم وړتیا په لوړولو کې د دې پروژې پر ارزښت ټینګار وکړ.
په پای کې د سيمې اوسېدونکو د دې پروژې له پلي کولو څخه خوښي وښوده او د خلکو د ځان او مال د ساتنې په برخه کې یې له پېښو سره د مبارزې آمادګۍ ملي ادارې له هڅو مننه وکړه.
نېټه: ۱۴۴۶/۱۱/۳
له پېښو سره د مبارزې آمادګۍ ملي اداره
