د میدان وردک ولایت له پېښو سره د مبارزې آمادګۍ ریاست ۲۰ تنه کارګرانو ته خوراکي مرستې ووېشلې
د میدان وردک ولایت له پېښو سره د مبارزې آمادګۍ ریاست، هغو ۲۰ تنه کارګرانو ته چې د مرکز میدان ښار د کشمیري قلعه سیمې اړوند د کانال د پاکولو په پروژه کې یې کار کړی و، خوراکي مرستې ووېشلې.
دغو کارګرانو د ۱۱۰۰ متره په اوږدوالي د کانال د پاکولو د پروژې له بشپړولو وروسته، چې د وروستیو سېلابونو له امله د رامنځته شوو خطرونو د کمولو او د اوبو د جریان د ښه والي په موخه ترسره شوې وه، د یاد ریاست له لوري خوراکي مرستې ترلاسه کړې. دغه کانال تر بشپړېدو وروسته رسمآ ګټې اخیستنې ته وسپارل شو.
د میدان وردګ ولایت له پېښو سره د مبارزې آمادګۍ رئیس، مولوي احمدشاه ذهین د کارګرانو د صادقانه او مسوولانه هڅو د ستاینې ترڅنګ وویل چې د ورته پروژو لومړنۍ سروې او معلومات د ولایت په یو شمېر نورو ولسوالیو کې هم بشپړ شوي او عملي کار به یې په نږدې راتلونکي کې په رسمي ډول پیل شي.
