د میدان وردګ ولایت په نرخ ولسوالۍ کې د ویالې د ترمیم او د خوړ او ویالې د پاکولو کار پیل شو
له پېښو سره د مبارزې آمادګۍ ادارې د لوی رئیس، محترم الحاج ملا نورالدین ترابي په لارښوونه، د میدان وردګ ولایت له پېښو سره د مبارزې آمادګۍ ریاست د یاد ولایت د نرخ ولسوالۍ د غونډۍ کلا په سیمه کې د یوه خوړ د پاکولو او ورسره د ۱۰۰ مترو په اوږدوالي د ویالې د ترمیم او پاکولو عملي کار پیل کړ.
یاده پروژه د سیلابونو د خطرونو کمولو او د سیمې د اوسېدونکو د ځان او مال د خوندیتوب په موخه پلې کېږي. د یادونې وړ ده چې د خوړ د پاکولو لومړنۍ سروې څه موده وړاندې ترسره شوې وه او د سروې د پایلو پر بنسټ د دې پروژې چارې پیل شوې.
د دغې پروژې د پلي کېدو لپاره له پېښو سره د مبارزې آمادګۍ ادارې له لوري ۶۰۰ لیټره تېل منظور شوي دي. ټاکل شوې ده چې د خوړ د پاکولو او د ویالې د ترمیم او پاکولو د چارو له بشپړېدو وروسته به د سیمې د اوسېدونکو کورونه، کرنیزې ځمکې او حاصلات د سیلابونو له ګواښ څخه خوندي شي.
د میدان وردګ ولایت له پېښو سره د مبارزې آمادګۍ رئیس، مولوي احمد شاه ذهین وویل چې هڅه کوي څو د ولایت په نورو ولسوالیو کې هم د وقایوي پروژو پلي کولو بهیر ته دوام ورکړي، څو د خلکو ستونزو ته به پر وخت رسېدنه وشي.
نېټه: ۱۴۴۷/۱۲/۲۸ هـ ق
له پېښو سره د مبارزې آمادګۍ اداره
