د نیمروز ولایت والي په پل ابریشم کې د را ایستل شویو کډوالو لپاره له پېښو سره د مبارزې آمادګۍ ملي ادارې له پنډغالي څخه لیدنه وکړه

نن د چهارشنبې په مازدیګر، د نیمروز ولایت والي، مولوي شیخ محمد قاسم، په پل ابریشم صفري نقطه کې د هغو کډوالو لپاره له جوړ شوي پنډغالي څخه لیدنه وکړه، چې په اجباري توګه له ایران څخه را ایستل شوي دي. دا پنډغالی له پېښو سره د مبارزې آمادګۍ ملي ادارې لخوا د ایستل شویو کډوالو وضعیت ته د بیړنۍ رسېدنې او انساني پاملرنې په موخه جوړ شوی دی.
د نیمروز والي په دې لیدنه کې، د پنډغالي له بېلابېلو برخو څخه لیدنه وکړه او د چمتو شويو خدماتو څخه یې د رضایت ښودنې تر څنګ وویل چې د موجوده آسانتیاوو په پام کې نیولو سره، کډوالو ته د رسېدنې په برخه کې له پېښو سره د مبارزې آمادګۍ ملي ادارې اقدامات د ستاینې وړ دي.
هغه همدارنګه زیاته کړه، چې د خیمو، سړې د څښاک اوبه، بریښنا، کولر، تشناب، حمام جوړول او لومړنۍ روغتیایي پاملرنې له هغو اساسي خدماتو څخه دي، چې په دې پنډغالي کې د کډوالو لپاره چمتو شوې دي.
مولوي شیخ محمد قاسم د پنډغالي جوړول کډوالو ته د رسېدنې په برخه کې یو مهم ګام وباله او زیاته یې کړه چې د دولتي بنسټونو همکارۍ د ایستل شویو کډوالو د وضعیت د ښه کولو لپاره حیاتي دي.
د نیمروز والي وویل، چې پنډغالي ته هره ورځ د ایران له خاورې څخه سلګونه کډوال را ایستل کېږي، چې ورته هرکلی او رسېدنه کېږي.
د نیمروز والي د خپلو خبرو په پای کې، له پېښو سره د مبارزې آمادګۍ ملي ادارې او نورو همکارو بنسټونو له مسؤلینو  وغوښتل چې له اړمنو کډوالو سره خپلو بشردوستانه خدماتو ته په ډیر جديت او ژمنتیا سره دوام ورکړي.

نېټه: ۱۴۴۷/١/۱۴ هـ ق
له پېښو سره د مبارزې آمادګۍ ملي اداره