د پنجشیر ولایت له پېښو سره د مبارزې آمادګۍ ریاست ۲,۲۱۶ مستحقو کورنیو ته د دوه یم پړاو نغدي پیسو د مرستو لړۍ پیل کړه
له پېښو سره د مبارزې آمادګۍ ملي ادارې او د (JCSSO) مؤسسې ترمنځ د لاسلیک شوي هوکړه لیک له مخې، د پنجشیر ولایت له پېښو سره د مبارزې آمادګۍ ریاست د یادې مؤسسې په مالي ملاتړ، د دې ولایت په دره، حصه اول او بازارک ولسوالیو کې ۲۲۱۶ مستحقو کورنیو ته د نغدي مرستو لړۍ پیل کړه.
په دې لړۍ کې د مسؤلینو په شتون کې، په بازارک سیمه کې د دوه یم پړاو مرستو تر سرلیک لاندې د دې پړاو ۷۴۰ کورنیو هرې یوې ته ۲،۷۶۳ افغانۍ ووېشل شوې، چې ټولټال د یاد شمېر کورنیو لپاره دوه میلیونه او څلورڅلویښت زره او شپږ سوه او شل (۲,۰۴۴,۶۲۰) افغانۍ ځانګړې شوې وې.
د یادونې وړ ده، چې د مرستو دا لړۍ په بازارک کې تطبیق شوه، او په دره او حصه اول ولسوالیو کې به ټولو ۲۲۱۶ کورنیو ته په څلورو دورو کې په راتلونکو ورځو کې دوام ولري.
نېټه: ۱۴۴۷/۰۵/۱۹ هـ ق
له پېښو سره د مبارزې آمادګۍ ملي اداره
