له پېښو سره د مبارزې آمادګۍ ملي ادارې او د درمان مؤسسې تر منځ د ګډو همکاریو تفاهمنامه لاسلیک شوه
نن سهار د شنبې په ورځ، له پېښو سره د مبارزې آمادګۍ ملي ادارې سرپرست، الحاج ملا نورالدین ترابی، د درمان مؤسسې د پروژې له مسئول محمد صابر عليخېل سره په خپل کاري دفتر کې وکتل او د ګډو همکاریو تفاهمنامه یې ورسره لاسلیک کړه.
په دې ناسته کې تـرابی صاحب، ښاغلي عليخېل ته د ښه راغلاست ویلو ترڅنګ زیاته کړه، چې له زیانمنو شویو خلکو سره مرسته زموږ له اساسي مسئولیتونو څخه ده، او له همدې امله موږ نه یوازې دا چې د مؤسسو لپاره د خلکو د مرستې زمینه په ټولو ولایتونو کې برابروو، بلکې ملاتړ یې هم کوو.
وروسته د درمان مؤسسې د پروژې مسئول، د دې ترڅنګ چې د یادې مؤسسې د روانې پروژې په اړه یې معلومات وړاندې کړل، له پېښو سره د مبارزې آمادګۍ ملي ادارې مشرتابه او کارکوونکو ته یې د همکارۍ، د کار پروسې د چټکتیا، او د مرستندویه مؤسسو لپاره د آسانتیا برابرولو له امله د خیر دعا وکړه.
د یادونې وړ ده، چې د دې تفاهمنامې له مخې به ، د ۷۵,۲۰۰ ډالره په ټولیز ارزښت، ۱۴۰۰ کورنیو ته په کابل، ننګرهار او لغمان ولایتونو کې هرې کورنۍ ته د ۵۲ ډالرو په ارزښت د خوراکي توکو یو راشن ویشل کېږي، چې په هر راشن کې به ۵۰ کیلو اوړه،۲۰ کیلو وریجي، ۵ لیټره غوړي، ۲.۵ کیلو لوبیا، نیم کیلو چای او ۲ کیلو بوره شامل دي. په دې توګه چې ۶۰۰ کورنیو ته په کابل، ۴۰۰ کورنیو ته په ننګرهار او ۴۰۰ نورو کورنیو ته په لغمان ولایت کې مرستې ځانګړې شوې دي.
نېټه: ۱۴۴۶/۱۱/۱۲ هـ ق
له پېښو سره د مبارزې آمادګۍ ملي ادارې
