له پېښو سره د مبارزې آمادګۍ ملي ادارې او د AAR Japan خیریه موسسې ترمنځ د ۵۰۲٫۲۹۶ (پنځه لکه دوویښت زره او شپږ نوي) ډالرو په ارزښت د ګډو همکاریو تفاهم‌نامه لاسلیک شوه

نن ورځ سه شنبه له ماسپښین وروسته، له پېښو سره د مبارزې آمادګۍ ملي ادارې سرپرست محترم الحاج ملا نورالدین ترابي د AAR Japan  خیریه موسسې له رئیس محترم محمد بشیر باصر سره په خپل کاري دفتر کې وکتل او د ګډو همکاریو تفاهم‌نامه یې ورسره لاسلیک کړه.
په دې ناسته کې محترم ترابي صاحب د یادې موسسې پلاوي ته ښه راغلاست ووېل او څرګنده یې کړه چې له پېښو سره د مبارزې آمادګۍ ملي ادارې تل هڅه کړې چې د هغو موسسو سره همکاري وکړي چې په بشري چارو کې فعالیت کوي. هغه زیاته کړه چې له موسسو څخه تمه کوو ترڅو د زیاتو مرستو په جذب اومستحقینو ته یې په شفافه او پر وخت وېش کې لا زیاتې هڅې وکړي.
همدارنګه، د AAR Japan موسسې رئیس محمد بشیر باصر د ترابي صاحب له همکارۍ او د موسسو د ستونزو د هوارولو په برخه کې د هغه له جديت څخه مننه وکړه او زیاته یې کړه چې د دې موسسې کارکوونکي په مرکز او ولایتونو کې له مرسته کوونکو ادارو سره بشپړه همکاري کوي.
د یادونې وړ ده چې د لاسلیک شوې تفاهم‌نامې له مخې به یاده موسسه د ۵۰۲٫۲۹۶ (پنځه لکه دوویښت زره او شپږ نوي) ډالرو  په ارزښت د کابل ښار او د زابل ولایت په شملزایي، شینکي، نرنګ او جلدک ولسوالیو کې د ماینونو او ناچاودو مهماتو د خطرونو په اړه د عامه پوهاوي پروګرامونه ترسره کړي، په دې توګه چې دغه پروژه درې اساسي برخې لري:
۱. په ټولنه کې د چاودېدونکو توکو په اړه د ښوونې او روزنې سیسټم رامنځته کول.
۲. د رسنیو او ښوونیزو موادو له لارې د ماینونو او ناچاودو توکو د خطرونو په اړه د عامه پوهاوي وړاندې کول.
۳.   په ټولنه کې د ماینونو او ناچاودو مهماتو د خطرونو په اړه د ښوونیزو فعالیتونو د اغېزمنتیا ارزونه.

نیټه: ۱۴۴۶/۷/۲۷
له پېښو سره د مبارزې آمادګۍ ملي اداره