له پېښو سره د مبارزې آمادګۍ ملي ادارې د اقلیمي بدلونونو او له پېښو سره د مبارزې د ستراتیژیک پلان مشورتي غونډه د اړوندو سازمانونو په شتون کې ترسره کړه

نن سهار، سه‌شنبه، له پېښو سره د مبارزې آمادګۍ ملي ادارې سرپرست، الحاج ملا نورالدین ترابي، د اقلیمي بدلونونو او له پېښو سره د مبارزې د ستراتیژیک پلان په مشورتي غونډه کې چې د دې ادارې له‌ لوري د توانمندۍ، چاپېړیال ساتنې او بشري مرستو موسسې (REHA) په همکارۍ ترسره شوه، ګډون او وینا وکړه. په دې غونډه کې د IFRC فدراسیون سرپرست، د ریاست‌الوزرا اقتصادي معاونیت، د کانونو او پټرولیم، ملي دفاع، عامې روغتیا، مالیې، کډوالو او راستنېدونکو، ټولګټو، اوبو او انرژۍ وزارتونو، سره میاشت، د کابل ښاروالۍ، د کابل پوهنتون، او همدارنګه د الفا، کوآر، CWSA، WFP، IOM، AKHA، NCA THT، OPOP، IMAP, NEPA او د IRC موسسو استازو او د دې ادارې رییسانو او کارپوهانو ګډون کړی و.
محترم ترابي صاحب په دې غونډه کې وویل چې د دې ادارې مخکینی پنځه کلن پلان بشپړ شوی دی. د همدې لپاره یوه کمېټه ټاکل شوې وه ترڅو د پېښو مدیریت لپاره ستراتیژیک پلان ترتیب او چمتو کړي، چې اوس یې لومړنۍ طرحه ترتیب شوې او د همکارو ادارو سره شریکه کېږي ترڅو خپل نظرونه د دې پلان د لا غني کولو لپاره وړاندې کړي.
نوموړي د CWSA موسسې د مخکیني پلان په ترتیب کې له همکارۍ او د REHA موسسې د اوسني پلان په ترتیب کې له همکارۍ څخه مننه وکړه او زیاته یې کړه چې دا اداره له موسسو سره ښې همکارۍ لري او هغوی ته په خوندي توګه د فعالیتونو ترسره کولو زمینه برابروي. د دې ترڅنګ ټولو ولایتي ریاستونو ته لارښوونه شوې چې له هغو موسسو سره بشپړه همکاري وکړي چې د پېښو مدیریت او د زیانمنو خلکو سره د مرستو په برخه کې کار کوي.
په همدې حال کې، د REHA موسسې مشر محمد یوسف حمیدیار، د دې پروګرام موخه تشریح کړه او د یادې موسسې په اړه یې معلومات وړاندې کړل. هغه وویل چې په تېرو دوو کلونو کې یې د پېښو مدیریت او اقلیمي بدلونونو په برخه کې کار کړی دی او هغه ژمنه وکړه چې REHA موسسه د پېښو مدیریت په برخه کې د همکاري لپاره چمتو ده.
همدارنګه، د IFRC فدراسیون سرپرست ښاغلي احمد د پېښو مدیریت په برخه کې د دغه سازمان د همکارۍ په اړه خبرې وکړې او خوښي یې وښوده چې په دې غونډه کې ګډون لري. د کوآر موسسې مشر عبدالحلیم حلیم، د موسسو په استازیتوب خبرې وکړې او په دې برخه کې یې د همکارۍ لپاره ډاډ ورکړ.
د یادونې وړ ده چې د REHA موسسې مرستیال محترم عزت‌الله صدیقي، په افغانستان کې د پېښو مدیریت او اقلیمي بدلونونو په اړه او د دې ادارې د پالیسۍ او پروګرامونو د پراختیا کارپوه محمد روکی عمري، د پېښو مدیریت د ستراتیژیک پلان په اړه پرېزنټیشنونه وړاندې کړل.
په پای کې ګډونوال په څلورو کاري ډلو ووېشل شول، چې هره ډله یې د پېښو د کمښت، د چمتووالي نیولو، ځواب وینې او بیا رغونې او له پخوا څخه په ښه توګه بیا جوړونې په برخو کې ټاکل شوې وه. هغوی د پلان په اړه په تفصیل سره له بحث وروسته خپل نظریات غونډې ته تشریح کړل، او پرېکړه وشوه چې د دوی اغېزمن نظرونه به په ستراتیژیک پلان کې شامل شي.

نیټه: ۱۴۴۶/۶/۲۹
له پېښو سره د مبارزې آمادګۍ ملي اداره