له پېښو سره د مبارزې آمادګۍ ملي ادارې د تورخم د کډوالو پنډغالي اړوند له روغتیایي کلینیکونو سره د څو قلمه درملو مرسته وکړه
له پېښو سره د مبارزې آمادګۍ ملي ادارې يو پلاوي د ماین پاکۍ د انسجام او همغږۍ رئیس، قاري نورالدین رستمخېل په مشرۍ د مهماتو د کارپوه محمد حامد وردګ په ملتیا، د تورخم د کډوالو له پنډغالي څخه د لېدنې او د دې پنډغالي روغتیایي کلینیکونو ته د قزاقستان لخوا د مرسته شویو درملو د وېش په موخه ننګرهار ولایت ته سفر وکړ.
په دې سفر کې، د قزاقستان مرسته شوي درمل د تورخم د کډوالو د پنډغالي روغتیايي مرکزونو ته د آریا ماینپاکۍ موسسې، له پېښو سره د مبارزې آمادګۍ ملي ادارې، او نورو اړوندو سازمانونو په همکارۍ ووېشل شول.
د دې سفر پر مهال، د ننګرهار ولایت له پېښو سره د مبارزې آمادګۍ ریاست د استازو، د پچیرا اګام ولسوالۍ د خلکو استازو، او د آریا ماینپاکۍ موسسې د استازو په ګډون یو غونډه ترسره شوه. په دې غونډه کې د مرستو د اغېزمن وېش لپاره د اړینو همغږیو او د کډوالو د روغتیايي اړتیاوو د څېړلو په اړه بحث او نظرونه تبادله شول.
له پېښو سره د مبارزې آمادګۍ ملي ادارې، د قزاقستان له هېواد څخه د دغو بشري مرستو له امله مننه قدرداني وکړه او ټینګار کوي چې د کډوالو او اړمنو د روغتیايي وضعیت د ښه والي لپاره به هڅې دوام ولري.
نېټه: ۱۴۴۶/۱۱/۰۶ هــ ق
له پېښو سره د مبارزې آمادګۍ ملي اداره
