له پېښو سره د مبارزې آمادګۍ ملي ادارې سرپرست د اسلامي هوساینې نړیوالې موسسې له سرپرست سره د ۴۱۴,۸۶۵ (څلور لکه څلورلس زره اته سوه پنځه شپیته) ډالرو په ارزښت د ګډو همکاریو تفاهم نامه لاسلیک کړه

نن د چهار شنبې په ورځ له ماسپښین وروسته له پېښو سره د مبارزې آمادګۍ ملي ادارې سرپرست الحاج ملا نورالدین ترابي، د اسلامي هوساینې نړیوالې موسسې له سرپرست محترم شريف احمد سره وکتل او د ګډو همکاریو تفاهم‌نامه یې ورسره لاسلیک کړه.
په دې ناسته کې، ترابي صاحب راغلي پلاوي ته د ښه راغلاست ویلو ترڅنګ د اسلامي هوساینې نړیوالې موسسې له مرستو څخه مننه وکړه او ویې ویل چې دا د روژې میاشتې مرستې ډېرې مهمې او ارزښتناکې دي او اړتیا ده چې د روژې مبارکې میاشتې له را رسېدو مخکې مستحقو کسانو ته وویشل شي.
 همداراز نوموړي غوښتنه وکړه چې دا ډول مرستې دې د هېواد په نورو برخو کې هم اړمنو خلکو ته ورسیږي.
وروسته د اسلامي هوساینې نړیوالې موسسې سرپرست شريف احمد، د ترابي صاحب له هرکلي او همکارۍ څخه مننه وکړه او ویې ویل چې دا مرستې د روژې میاشتې مرستې تر نامه لاندې د طبیعي پېښو له امله زیانمنو شویو کورنیو بې‌وزله او اړمنو کسانو ته د خوراکي توکو برابرولو په موخه په هرات او غور ولایتونو کې ویشل کېږي.
د یادونې وړ ده چې یاده تفاهم نامه چي د  414865 څلور لکه څلورلس زره اته سوه پنځه شپیته ډالرو په  ارزښت لاسلیک سوه له مخې به یې  په هرات او غور ولایتونو کې ۴,۶۵۱ کورنیو ته د روژې میاشتې لپاره مرستې ورکړل شي، چې هرې کورنۍ ته به ۵,۰۴۹ افغانۍ ووېشل شي.

نېټه: ۱۴۴۶/۸/۶ هــ ق 
له پېښو سره د مبارزې آمادګۍ ملي اداره