له پېښو سره د مبارزې آمادګۍ ملي ادارې سرپرست د سرپناه او غیر خوراکي مرستو د کلستر له همغږي کوونکو سره وکتل
نن د پنجشنبې په سهار، له پېښو سره د مبارزې آمادګۍ ملي ادارې سرپرست، الحاج ملا نورالدین ترابي، د (IOM) د لنډ مهالې سرپناه د کلستر له همغږي کوونکې اغلې سوسن سعد، د هغې له مرستیال محمد هاشم نیازی او د (UNHCR) د سرپناه د کلستر له مرستیال همغږي کوونکي و محمد باقر حیدري سره وکتل او د اجباري اېستل شویو کډوالو او د یاد کلستر د فعالیتونو په اړه یې خبرې وکړې.
په دې لیدنه کې ترابي صاحب د لنډمهالې سرپناه د کلستر پلاوي ته د ښه راغلاست ویلو ترڅنګ، په اجباري توګه اېستل شویو کډوالو ته د رسیدنې په اړه وویل، چې سره له دې چې د کډوالو چارو ته د رسېدنې په برخه کې ځانګړې وزارت موجود دی، خو په دې وروستیو کې د اېستل شویو کډوالو لوړ شمېر ته په کتو، د عالیقدر امیرالمؤمنین حفظهالله په لارښوونه، دولس کاري کمیټې جوړې شوې دي، تر څو کډوالو ته رسېدنه وکړي. هغه زیاته کړه چې له پېښو سره د مبارزې آمادګۍ ملي اداره هم د تورخم او سپین بولدک په فرضي پوله کې موظفه ده، چې له نورو ادارو سره یو ځای کډوالو ته رسیدنه وکړي. ترابي صاحب یادونه وکړه چې موږ په دې وروستیو کې یو معیاري پنډغالی د تورخم په پوله کې جوړ کړی دی. نوموړي همداراز د زیانمنو شویو او اړمنو سره د مرستو پر اړتیا ټینګار وکړ او ویې ویل چې مرسته باید د خلکو د اړتیاوو او د ځای د فرهنګ سره سمون ولري.
ترابي صاحب څرګنده کړه چې موږ نه وایو چې مرستې دې په مستقیمه توګه موږ ته وسپارل شي، خو زموږ نظر دا دی چې که مرستې زموږ سره په مشوره وویشل شي، نو ښه اغېزمنتیا به یې زیاته وي، ځکه چې خلک موږ ته مراجعه کوي او خپلې ستونزې بیانوي. نوموړي زیاته کړه: موږ د خلکو د خدمت لپاره معاش اخلو، نو زموږ دنده دا ده چې د مرستندویه ادارو لپاره اسانتیاوې برابرې کړو او په کارونو کې چټکتیا او شفافیت رامنځته کړو.
په همدې حال کې، د لنډمهالې سرپناه د کلستر همغږي کوونکې اغلې سوسن سعد، د هغې مرستیال محمد هاشم نیازی او د دې کلستر مرستیال همغږي کوونکي محمد باقر حیدري د ادارې له سرپرست څخه مننه وکړه او ویې ویل چې له مرستندویه موسسو سره په چټکۍ د هوکړه لیکونو د لاسلیک کولو له امله، دوی توانېدلي چې ژمنۍ مرستې او نورې پروژې پر وخت پلي کړي.
هغوی هر یو د خپلو اړونده برخو د فعالیتونو په اړه معلومات وړاندې کړل او ویې ویل چې په اجباري توګه د اېستل شویو کډوالو لپاره د هېواد په بېلابېلو سرحدي سیمو کې ټیمونه موجود دي چې د اړتیا له مخې مرستې برابروي.
همداراز، د لنډمهالې سرپناه د کلستر همغږي کوونکو وویل چې له پېښو سره د مبارزې آمادګۍ ملي ادارې د سرپرست پیغام به خپلو نورو همکارو شریکانو ته ورسوي، ترڅو د پېښو له زیانمنو، اړمنو او کډوالو سره د لا زیاتو همکاریو زمینه برابره شي.
نېټه: ۱۴۴۶/۱۱/۳ هــ ق
له پېښو سره د مبارزې آمادګۍ ملي اداره
