له پېښو سره د مبارزې آمادګۍ ملي ادارې لوی رئیس د اسلامي رفاه مؤسسې له رئیس سره وکتل

نن ورځ د سې شنبې په سهار، له پېښو سره د مبارزې آمادګۍ ملي ادارې لوی رئیس، محترم الحاج ملا نورالدین ترابي، د اسلامي رفاه مؤسسې له رئیس محترم ذوالقرنین، د پروګرامونو له مسؤل ابراهیم احمد او مل پلاوي سره په خپل کاري دفتر کې وکتل او د پېښو د مدیریت او د زیانمنو کسانو د لاسنیوي په اړه یې خبرې وکړې.

محترم ترابي صاحب وویل، چې هره اداره خپلې ټاکلې دندې لري او د همدې لړۍ له مخې زموږ اداره په ټول هېواد کې د پېښو د مدیریت او د پېښو له امله زیانمنو شویو کسانو ته د رسېدنې مسؤلیت پر غاړه لري. نوموړي زیاته کړه، له دې امله چې ډېري مؤسسې له موږ سره همکارۍ کوي، موږ ورته هم په مرکز او هم په ولایتونو کې ټولې آسانتیاوې برابرې کړې دي، تر څو وکولای شي د خلکو ستونزو ته په ښه توګه رسېدنه وکړي. هغه همدارنګه وویل، چې د پروژو او اړینو اړتیاوو لېست، چې په حقیقت کې د خلکو او سیمو اړتیاوې دي، ترتیب شوی او دا چې ستاسو د فعالیت اساسي سکټور د پېښو برخه ده، دغه لېست به له تاسو سره شریک کړو، تر څو یې د ۲۰۲۶ کال په خپلو پروګرامونو کې په پام کې ونیسئ.

په همدې حال کې، د اسلامي رفاه مؤسسې رئیس محترم ذوالقرنین وویل، چې د ترابي صاحب د مدیریت له کاري مخینې سره له پخوا اشنا دی او دا اداره د هغه تر رهبرۍ لاندې په چټک او ښه ډول فعالیت کوي. هغه د مؤسسو سره د دې ادارې له همکارۍ څخه ځانګړې مننه وکړه. همدارنګه د مؤسسې پلاوي وویل چې یاده مؤسسه د پېښو او د کډوالو د لاسنیوي په برخه کې فعالیت کوي، او د ۲۰۲۶ کال لپاره یې خپل پروګرامونه د ملي ادارې لوی رئیس ته تشریح کړل. نوموړي وویل چې په روان کال کې د نغدي مرستو پروګرامونه په ننګرهار او کونړ ولایتونو کې، د نغدي مرستو موسمي پروګرامونه، د رمضان مرستې، په څو ولایتونو کې د قربانۍ د غوښې وېش، د تورخم په عمري پنډغالي کې د کډوالو ملاتړ، په هرات ولایت کې د اوبو د شبکې جوړول او د روغتیایي کڅوړو وېش، د کونړ ولایت د چپه ‌درې ولسوالۍ د زلزله‌ ځپلو لپاره د سرپناه ترمیم او جوړول او نور اساسي فعالیتونه په خپلو پروګرامونو کې لري چې له دې ادارې سره به په ګډه پلي شي.

نوموړي همدارنګه، د خلکو او سیمو د اړتیاوو لېست ترلاسه کړ او ویې ویل، چې دا پروژې تر ډېره د مؤسسې د پروګرامونو برخې دي او د برابرولو لپاره به خپله وروستۍ هڅه وکړي.

په پای کې، ترابي صاحب د یادې مؤسسې د خدمتونو د قدر په توګه د اسلامي رفاه مؤسسې رئیس ته یوه ډالۍ هم ورکړه.

نېټه: ۱۴۴۷/۷/۲۳ هـ ق

له پېښو سره د مبارزې آمادګۍ ملي اداره