له پېښو سره د مبارزې آمادګۍ ملي ادارې لوی رئیس د کونړ ولایت په نورګل ولسوالۍ کې د مزار درې د سهیل تنګه له پنډغالي څخه لیدنه وکړه او د شهیدانو او ټپیانو لپاره یې د نغدو مرستو د وېش بهیر پیل کړ
له پېښو سره د مبارزې آمادګۍ ملي ادارې لوی رئیس, محترم الحاج ملا نورالدین ترابي، د کونړ ولایت له پېښو سره د مبارزې آمادګۍ رئیس, مولوي محمد مبین مفتون عمر او د مرکزي پلاوي په ملتیا د نورګل ولسوالۍ د مزار درې د سهیل تنګه له پنډغالي څخه چې د وروستۍ زلزلې له امله زیانمن شوي په کې مېشت دي, لیدنه وکړه او د شهیدانو او ټپیانو لپاره د دعا ترڅنګ د هغوی د کورنیو لپاره یې د نغدو مرستو د وېش لړۍ هم پیل کړه.
په دې دره کې، د سرحدي لوا قوماندان، مولوي محمد عمر یاسر, د کلیو د پراختیا رئیس، د کډوالو چارو رئیس او نورو سیمه ییزو مسوولینو د ترابي صاحب هرکلی وکړ. نوموړي وویل، که څه هم د پېښې په لومړۍ ورځ د زیانمنو سیمو لیدنې ته راغلی و، خو د مرستو د همغږۍ لپاره کابل ته ستون شو او اوس د عالیقدر امیرالمؤمنین حفظه الله د لارښوونې پر بنسټ, د مرستو د وېش، د خلکو ستونزو او د مسوولینو او مجاهدینو د کارونو د څارنې لپاره یې کونړ ته سفر کړی دی.
له پېښو سره د مبارزې آمادګۍ ملي ادارې لوی رئیس د نغدو مرستو د وېش پر مهال د شهیدانو له کورنیو سره خواخوږي وکړه او ویې ویل, چې دا مرستې یوازې د یادونې او تسلیت په موخه دي. د دې پروسې پر مهال د هر شهید کورنۍ ته شل زره (۲۰,۰۰۰) افغانۍ او هر ټپي ته لس زره (۱۰,۰۰۰) افغانۍ ووېشل شوې.
نېټه: ۱۴۴۷/۰۳/۲۲ هـ ق
له پېښو سره د مبارزې آمادګۍ ملي اداره
