په لغمان ولایت کې د یو استنادي دیوال د جوړېدو کار پیل شو
د لغمان ولایت له پېښو سره د مبارزې آمادګۍ ریاست، د یاد ولایت په ګلکاریو کلي کې د څه باندې ۱ میلیون افغانیو په ارزښت د یو استنادي دیوال د جوړولو کار پیل کړ.
د دې دیوال د جوړېدو کار د ولایت مقام مرستیال محترم مولوي اختر محمد، د لغمان ولایت له پېښو سره د مبارزې آمادګۍ رئیس قاري خیر محمد غازي، د اقتصاد او سیندیزو چارو رییسانو او قومي مشرانو په شتون کې پیل شو.
د لغمان ولایت له پېښو سره د مبارزې آمادګۍ رئیس ووېل چې، دغه استنادي دیوال له پېښو سره د مبارزې آمادګۍ ملي ادارې لخوا د څه باندې ۱ میلیون افغانیو په ارزښټ د یوې میاشت په موده کې د منصف ساختماني شرکت له لوري جوړېږي.
همدارنګه د لغمان ولایت مقام مرستیال د دې پروژې د کار پیل په مراسمو کې له پېښو سره د مبارزې آمادګۍ ملي ادارې څخه غوښتنه وکړه چې په دی ولایت کې د دغه ډول استنادي دیوالونو جوړولو لپاره لا زیاته همکاري وکړي.
نوموړي زیاته کړه چې د دغه ډول وقایوي پروژو په پلي کولو سره د طبیعي پېښو له امله د ځاني او مالي زیانونو مخه نیول کېږي.
د یادونې وړ ده چې د دې پروژې د کار په بشپړېدو سره به د ګلکاریو کلي سیمې او نورې اړوندې سیمې د سېلابونو له ګواښ څخه خوندي پاتې شي.
نېټه: ۲۶/۳/۱۴۴۶
له پېښو سره د مبارزې آمادګۍ ملي اداره
