پکتيا ولايت سیدکرم ولسوالۍ کې د سیلاب اوبو له امله ۷ زیانمنو کورنیو سره مرسته او غمشریکي ترسره شوه
د پکتيا ولايت سید کرم ولسوالۍ اړوند کاریز کلي کې د سیلاب اوبو په وجه د یو کور دیوال نسکوریدو له امله چې په پایله کې ۶ تنه ماشومان شهیدان او ۱ تن ماشوم ټپي دی چې ټول د یوې کورنۍ غړي وو د پېښو پر وړاندې مبارزې ریاست لخوا د خوراکي، غیر خوراکي توکو او نقدې افغانیو مرسته ترسره شوه.
د ذکر شوي پېښې قربانیانو ته د تسلیت او غمشريکی ویلو په موخه د پکتیا مرستیال والي تر مشری لاندې د پېښو پر وړاندې مبارزې ریاست ټول پرسونل او د بېړنیو حالاتو کنترول کمیسیون غړو اداراتو رئیس صاحبانو په ملتیا ذکر شوي سیمې ته سفر وکړ او د غمجنې کورنۍ فاتحه کې د ګډون سربېره د خوراکي، غیر خوراکي او نغدي افغانیو مرستې هم ترسره کړې.
په خوراکي توکو کې هرې کورنۍ ته ( اوړه، وريژې، لوبيا، چای، بوره، مالګه او غوړي) ، په غیر خوراکي توکو کې (کمپلې، ترپال، کورنۍ کیټ او د اوبو پلاستيکي سطلونه ) او په نغدي مرستو کې د هر شهید پر سر ۵۰۰۰۰ پنځوس زره نغدي افغانیو مرسته ترسره شوه.
د سفر او توکو د وېش پر مهال د پکتیا مرستیال والي محترم الحاج ډاکټر عبدالولي سهي سربېره د پېښو پر وړاندې مبارزې رئیس محترم شادیم خان هلال، د کرنې، اوبو لګولو او مالدارۍ رئیس محترم محمد دین مومند، د ژوند چاپېریال ساتنې رئیس محترم بهیر ګل صابري، د سیندیزې حوزې رئیس محترم محمد طاهر شفق، د مخابراتو او مالوماتي تکنالوژی رئیس محترم عبدالله توتاخیل، د سیدکرم ولسوالی امنیه قوماندان محترم مامور حسن، د سیدکرم ولسوال محترم محمد شریف کلیوال او د زیانمنې کورنۍ نږدې خپلوانو او ملګرو ګډون درلود.
د زیانمنې کورنۍ مشر محترم سلیم خان ته د پېښو پر وړاندې مبارزې رئیس شادیم خان هلال لخوا د جمهوري ریاست عالي مقام لومړي مرستیال محترم امرالله صالح او پېښو ته درسیدو په چارو کې د دولت وزیر محترم غلام بهاوالدین جیلاني د خواشینۍ او غمشریکی مراتب هم وړاندې شول.
د يادونې وړ ده چې د تېرې اوونۍ د شدیدو بارانونو اوسیلابونو له امله د پکتیا ولایت په نورو سیمو کې هم زیانونه اړولي چې د یو تن شهید سربېره چې هغه هم د سیدکرم ولسوالۍ اوسیدنکی دی په میرزکه، وزي ځدراڼ او مرکز ګردیز کې ۱۴ څوارلس د استوګنې کورونه په بشپړ ډول زیانمن کړيدي.
