د بغلان ولایت له پېښو سره د مبارزې آمادګۍ ریاست د ۳۶۳ سېلاب ځپلو کورنیو سروې بشپړه او د مرستو د وېشلو لړۍ یې پیل کړه

د بغلان ولایت له پېښو سره د مبارزې آمادګي ریاست د (IOM, ASIO/WFP, HYSO/UNICEF,   CHA, AKAH, ACTED, DACAAR) مؤسسو په همغږۍ د وروستیو سیلابونو له امله د یاد ولایت په مرکز او دوشي ولسوالۍ کې د زیانمنو کورنیو او تأسیساتو د سروې بهیر په بشپړه توګه پای ته ورسولو او ۱۱۷ زیانمنو کورنیو ته یې بیړنۍ خوراکي مرستې ووېشلې.

د یادې سروې په ترڅ کې څرګنده شوه چې د وروستیو سېلابونو له امله، ۵۰ کورنۍ په بشپړه توګه تخریب، ۳۱۳ کورنۍ په قسمي توګه تخریب، شاوخوا ۲۰ جرېبه کرنیزه ځمکه تخریب، ۲ مسجدونه په قسمي توګه تخریب، ۲ مدرسې په قسمي توګه تخریب، ۳ عدده عراده موټرونه تخریب، ۱ عدد موټرسایکل تخریب، ۲۰ د اوبو څاګانې تخریب او یو دوکان په بشپړه توګه تخریب شوی وو. 

د سروې له بشپړېدو وروسته د یاد ولایت له پېښو سره د مبارزې آمادګۍ ریاست ۱۱۷ زیانمنو شویو کورنیو هرې یوې ته دوه بورۍ ۵۰ کیلویي غنم او دوه بورۍ ۲۵ کیلویي وریجې ووېشل شوې .

د یادونې وړ ده، چې د یاد ریاست مسؤلین په دې هڅه کې دي چې پاتې زیانمنو کورنیو ته هم راتلونکې ورځ د مرستو وېش ترسره کړي، او له ټولو همکارو موسسو څخه یې غوښتنه کړې ده چې خپل بشري مرستې دې ژر تر ژره عملي کړي، تر څو ټولو زیانمونو کورنیو ته په خپل وخت مرسته ورسیږی.

نېته: ۱۴۴۷/۱۰/۱۸ ه.ق 

له پېښو سره د مبارزې آمادګۍ ملي اداره