د تخار ولایت اړوند سیمه کې د ګاو مالي کانال تحکیماتي کار پیل شو
د تخار ولایت مرکز د چرکچي او ملا غلام نبي کلیو اړوند سیمه کې د ګاو مالي کانال د تحکیماتي جوړولو کار له پیښو سره د مبارزې آمادګۍ ریاست لخوا د ۱،۸۱۶،۹۹۰ افغانیو په ارزښت پیل شو.
ملا احمد سیر ساجد، د تخار ولایت له پیښو سره د مبارزې آمادګۍ ریاست مشر، د یادې پروژې د کار پیل په غونډه کې چې د سیمه ییزو چارواکو او سیمې خلکو په شتون کې ترسره شوه، وویل: دغه پروژه له پیښو سره د مبارزې آمادګۍ ملي ادارې لخوا جوړېږي چې کیفیت ته به یې ډېره پاملرنه وشي. هغه همدا راز زیاته کړه چې د داسې پروژو په پلي کولو سره به د سیلابونو له کبله رامنځته کېدونکي تلفات او زیانونه کم شي او له پیښو سره د مبارزې آمادګۍ ملي ادارې له مشرتابه یې غوښتنه وکړه چې د وقایوي پروژو په پلي کولو کې همکاري وکړي.
د یادونې ده چې د ګاو مالي کانال ۱۳۰ متره اوږدوالی لري او د دې پروژې په بشپړیدو سره به لسګونه کورونه، د تګ راتګ لارې او د سیمې سلګونه جریبه کرنیزه ځمکه د احتمالي سېلاب له خطر څخه وساتل شي.
نېټه: ۱۸/۴/۱۴۴۶
له پېښو سره د مبارزې آمادګۍ ملي اداره
