د زابل ولایت په سیوري ولسوالۍ کې د اوبو یو چکډیم پرانیستل او ګټې اخیستنې ته وسپارل شو
د کډوالۍ نړیوال سازمان (IOM) سره له پېښو سره د مبارزې آمادګۍ ملي ادارې د لوی رئیس، محترم الحاج ملا نورالدین ترابي د همغږۍ او هڅو په پایله کې، د زابل ولایت له پېښو سره د مبارزې آمادګۍ ریاست د یاد سازمان په مالي ملاتړ، د دې ولایت د سیوري ولسوالۍ په قزک کلي کې د اوبو یو چیکډیم جوړولو کار بشپړ کړ او رسمآ یې ګټې اخیستنې ته وسپاره.
دا چیکډیم ۵۱ متره اوږدوالی، په سر کې ۱ متر او په لاندې برخه کې ۴۵۰ سانتيمتره پلنوالی او ۴۶۰ سانتيمتره لوړوالی لري، او د اوبو د زیرمې حجم یې تقریباً ۱۴۴۰۰ متر مکعب دی. دا پروژه ټولټال د یو میلیون او څلور سوه درې پنځوس زره او پنځه سوه (۱,۴۵۳,۵۰۰) افغانیو په لګښت بشپړه شوې ده.
د دې پروژې د پرانیستې په مراسمو کې، د زابل ولایت له پېښو سره د مبارزې آمر، الحاج مولوي محمد یوسف محمد، د سیوري ولسوال، مولوي عبدالغفار نظیف، د څارنې د کمېټې غړو او ځايي اوسېدونکو ګډون درلود.
د دې پروژې په بشپړېدو سره، د سیمې څلور کاریزونه چې شاوخوا ۲۰۰ کورنۍ تر پوښښ لاندې لري، د اوبو د کمښت او د وچکالۍ له ستونزو څخه خوندي کېږي.
نېټه: ۱۴۴۷/۷/۱۷ هـ ق
له پېښو سره د مبارزې آمادګۍ ملي اداره
