د سمنګان ولایت له پېښو سره د مبارزې آمادګۍ ریاست د اداري ودانۍ د جوړولو کار پیل شو
د سمنګان ولایت له پېښو سره د مبارزې آمادګۍ ریاست د نوې اداري ودانۍ د جوړولو چارې، د ۱۳ میلیونه افغانیو په لګښت له پېښو سره د مبارزې آمادګۍ رئیس، مولوي احسانالله احسان، د سمنګان ولایت د مقام د دفتر رییس، له پېښو سره د مبارزې آمادګۍ ملي ادارې د تدارکاتو آمر احمدشاه ذهین او د اړوندو ادارو د چارواکو په شتون کې رسماً پیل شوې.
له پېښو سره د مبارزې آمادګۍ ملي ادارې د تدارکاتو آمر احمدشاه ذهین، وویل چې دا ودانۍ به په ۳۴۶ متر مربع ځمکه کې، په درې پوړونو کې، د اساسي معیارونو له مخې جوړه شي چې دا پروژه به په راتلونکو شپږو میاشتو کې بشپړه او ګټې اخیستنې ته وسپارل شي.
ورپسې د سمنګان ولایت له پېښو سره د مبارزې آمادګۍ رئیس، مولوي احسانالله احسان، ټینګار وکړ چې د دې ودانۍ له پیل څخه تر بشپړېدو پورې به پر کارونو جدي څارنه وکړي، ترڅو دا ودانۍ د اړینو معیارونو سره سمه جوړه شي.
همداراز، د یاد ریاست د مالي او اداري مدیر، عبدالمنان قادریار، د دې پروژې د پیل له امله خپله خوښي څرګنده کړه او ویې ویل چې له پېښو سره د مبارزې آمادګۍ ریاست تر دې مهاله خپله ځانګړې ودانۍ نه درلوده او خپل اداري فعالیتونه یې د کرایې په ودانیو کې ترسره کول. هغه زیاته کړه چې د دې ودانۍ په جوړېدو سره به اداري اسانتیاوې رامنځته شي او د دې ریاست چارې به په لا ښه کیفیت او اسانتیا سره ترسره شي.
نېټه:۱۴۴۶/۹/۱۶
له پېښو سره د مبارزې آمادګۍ ملي اداره
