د سپین بولدک له لاري د اجباري راستنېدونکو کډوالو ستونزو ته د رسېدني او لنډمهاله کمپ جوړولو په موخه ناسته وسوه
د سې شنبې په ورځ د کندهار سرپرست والي محترم حاجي ملاصاحب د اجباري راستنېدونکو مهاجرینو ستونزو ته د رسېدني او لنډمهاله کمپونو جوړولو له کمېسیون سره ولایت مقام کي وکتل، چي پرمهال یې د کندهار د کډوالو او بیرته راستنېدونکو چارو، د کرني اوبو لګولو او مالدارۍ، د کلیو د بیارغوني او پراختیا، سرې میاشتي او د پيښو په وړاندي د مبارزې ریاست رئیسانو او استازو هم شتون درلود.
د کمېسیون مشر او د کډوالو او بیرته راستنېدونکو چارو وزارت مرستیال مولوي عبدالرحمن راشد وویل؛ دوی د کندهار سپین بولدک ولسوالۍ ته د سفر په لړ کي د صفري نقطې څخه لیدنه وکړه، په یاده ولسوالي کي یې له ولسوال، امنیه قومندان او کمېسار سره ګډ مجلس وکړ، چي په یاد مجلس کي د کډوالو پر تخمیني شمېري ترڅنګ د کډوالو پر اړتیاوو؛ لکه: سایوان، اوبه، تشنابونو، روغتیا، خوړو، ترانسپورټ او د کمپ ځای معلومولو اړوند هر اړخیزه بحث او خبري وسوې. د نوموړي په خبره؛ کمېسیون د کمپ لپاره په دغه ولسوالي کي بېلابیلي سیمي وکتلې، چي په پایله کي د وت غره ته نژدې د سړک پر غاړه غرب اړخ ته شاوخوا شپږ سوه جریبه مځکه وټاکل سوه، چي ولایتي کمېټه باید ددې کمپ پر جوړولو او دغه راز د هرډول اسانتیاوو او خدماتو چمتو کولو په موخه عملاً ورباندي کار پيل کړي.
د کندهار سرپرست والي محترم حاجي ملاصاحب له دوی ټولو څخه ځانګړې مننه وکړه او د بشپړي همکارۍ ډاډ یې وړاندي کړ او ویې ویل؛ د مرستیال والي په مشرۍ ولایتي کمېټه به ستاسي سره په همږغۍ ټولي چاري مخته وړي او غوښتنه یې وکړه، ترڅو لنډمهاله کمپ د ډېرو کډوالو کورنیو لپاره جوړ کړي او هم ورته د ژوند کولو ټولي اړتیاوي ورپوره کړي.
