د فاریاب ولایت له پېښو سره د مبارزې آمادګۍ ریاست ۱۴,۰۹۳ اړمنو کورنیو ته نغدې او خوراکي مرستې ووېشلې
له پېښو سره د مبارزې آمادګۍ ملي ادارې او د هنګري نړیوالو مرستو موسسې (HIA)، د فاریاب ولایت له پېښو سره د مبارزې آمادګۍ ریاست د یادې موسسې په تخنیکي همکارۍ او د خوړو نړیوال پروګرام (WFP) په مالي ملاتړ، د یاد ولایت په ۷ ولسوالیو اندخوی، خانچهارباغ، قرغان، قرمقول، دولت آباد، بلچراغ او پشتونکوټ کې ۱۴,۰۹۳ اړمنو کورنیو ته له سروې وروسته نغدې او خوراکي مرستې ووېشلې.
په دې لړۍ کې هرې کورنۍ ته د سیمه ییزو مسؤلینو په شتون کې، ۲,۹۰۰ افغانۍ ووېشل شوې، چې ټولټال څلوېښت میلیونه او اته سوه نه شپېته زره او اووه سوه (۴۰,۸۶۹,۷۰۰) افغانۍ نغدې پیسې د یاد شمېر کورنیو لپاره ځانګړې شوې وې.
همدا راز، په شیرین تګاب، ګرزیوان، بندر او لولاش ولسوالیو کې هرې کورنۍ ته ۵۰ کیلو اوړه، ۴.۵۵ کیلو غوړي، نیم کیلو مالګه او ۶.۲۵ کیلو دال ووېشل شول.
نېټه: ۱۴۴۷/۰۳/۲۲ هـ ق
له پېښو سره د مبارزې آمادګۍ ملي اداره
