د لغمان ولایت له پېښو سره د مبارزې آمادګۍ ریاست د ماینپاکۍ له کارونو څخه لیدنه وکړه
د لغمان ولایت له پیښو سره د مبارزې آمادګی رئیس، محترم قاري خیر محمد غازي په مشرۍ یو پلاوي په یاد ولایت کې د هیلو ټرسټ د ماینپاکۍ مؤسسې له کارونو څخه څارنه وکړه.
د هیلوټرسټ مؤسسې د لغمان ولایت مرکز مهترلام په ۲ جګړې ځپلو سیمو کې د ماینونو د پاکولو چارې او په ۲ نورو سیمو کې د خلکو لپاره د ماینونو او ناچاوده توکو د خطرونو په اړه د پوهاوي ورکولو پروګرامونه پیل کړي دي. دا فعالیتونه له پیښو سره د مبارزې آمادګی ریاست په غوښتنې او له پېښو سره د مبارزې آمادګۍ ملي ادارې د ماینپاکۍ چارو د انسجام او همغږۍ ریاست په همکارۍ ترسره کيږي، چې تر دا مهال، د لغمان ولايت مرکز مهترلام اړوند د شمټي کلي سرته په پنج پای سيمه کې تقريبا ۱۰,۰۰۰ متره مربع سیمه له ماينونو او ناچاوده توکو څخه پاکه شوې او د نورو سیمو د پاکولو چارې دوام لري.
له پیښو سره د مبارزې آمادګی ریاست د هیلو ټرسټ مؤسسې بشردوستانه هڅې وستایلې او د دوامداره همکارۍ ډاډ ورکوي، تر څو د لغمان ولایت خلکو ته د ماینونو له خطرونو څخه خوندي چاپېریال برابر شي.
نېټه: ۱۴۴۷/۴/۲۹ هـ ق
له پېښو سره د مبارزې آمادګۍ ملي اداره
