د لغمان ولایت له پېښو سره د مبارزې آمادګۍ ریاست ۲۵۵ زیانمنو کورنیو ته خوراکي مرستې ووېشلې
له پېښو سره د مبارزې آمادګۍ ادارې او د RRDPO مؤسسې ترمنځ د لاسلیک شوي هوکړهلیک له مخې، چې تمویل کوونکی یې د خوړو نړیوال پروګرام (WFP) دی، د لغمان ولایت له پېښو سره د مبارزې آمادګۍ ریاست، د یادې موسسې په تخنیکي همکارۍ، د دې ولایت په مرکز مهترلام او د عليشنګ، علینګار، قرغیو، فراشغان او دولتشاه ولسوالیو کې ۲۵۵ زیانمنو کورنیو ته خوراکي مرستې ووېشلې.
دغه مرستې په دوو پړاوونو کې د مهترلام مرکز او علیشنګ، علینګار، قرغیو، فراشغان او دولتشاه ولسوالیو ۲۳۶ زیانمنو کورنیو سره ووېشل شوې، چې په لومړي پړاو کې هرې کورنۍ ته ۲۰۰ کیلو اوړه، ۱۸.۲ کیل غوړي، ۲۵ کیلو دال او ۲ کیلو مالګه ووېشل شوه. همدارنګه، د مرستو په دویم پړاو کې د مرکز مهترلام او د علینګار او قرغیو ولسوالیو ۱۹ زیانمنو کورنیو هرې یوې ته ۱۰۰ کیلو اوړه، ۹.۱ کیلو غوړي، ۱۲.۵ کیلو دال او یو کیلو مالګه ووېشل شوه.
د مرستو ترلاسه کوونکو کورنیو د دغو مرستو په ترلاسه کولو خوښي څرګنده کړه او د لغمان ولایت له پېښو سره د مبارزې آمادګۍ ریاست، د خوړو نړیوال پروګرام (WFP) او د RRDPO مؤسسې څخه یې مننه وکړه چې د اړتیا پر وخت د زیانمنو کورنیو لاسنیوی کوي او بشري مرستې ورته رسوي.
د لغمان ولایت له پېښو سره د مبارزې آمادګۍ ریاست د همکارو بنسټونو له دوامدارو همکاریو څخه مننه وکړه او ټینګار یې وکړ چې د دغه ډول بشري مرستو دوام د زیانمنو کورنیو د لومړنیو اړتیاوو په پوره کولو او د هغوی د ژوند د وضعیت په ښه والي کې مهم رول لري. دغه ریاست همدارنګه ډاډ ورکړ چې د همکارو بنسټونو په همغږۍ به د ولایت په کچه د قدرتي پېښو زیانمنو ته د رسېدنې بهیر دوام ولري.
