د لغمان ولایت په سنګره دره کې د یوې بندې لارې د پاکولو کار بشپړې او بېرته پرانېستل شوه
د لغمان ولایت له پېښو سره د مبارزې آمادګۍ ریاست د ولایت د محترم مقام د لارښوونې پر بنسټ، د سنګره درې د کلمان سیمې اړوند په لمټک او فارج کلیو کې د بندو شویو لارو د پاکولو بهیر په بریالیتوب سره بشپړ کړ او دا لاره یې د دوه یم ځل لپاره د ترافیکو پر مخ پرانېسته.
د مسؤلینو په وینا، تېره ورځ د غره د ښویېدو له امله څو لویې ډبرې سړک ته را لوېدلې وې چې تګ راتګ یې بند کړی و. تخنیکي ټیم تېره ورځ د پرله پسې هڅو په ترڅ کې دا ډبرې له لارې څخه لرې کړې او سړک یې بېرته عادي حالت ته راوګرځاوه.
د لغمان ولایت له پېښو سره د مبارزې آمادګۍ ریاست محترم رئیس، قاري خیرمحمد غازي، له تخنیکي ټیم سره یو ځای سیمې ته تللی او د کار بهیر یې له نیږدې څارلی دی. هغه وویل چې د مسؤلو کارکوونکو د پر وخت اقدام له امله، لاره په لنډ وخت کې بېرته پرانېستل شوه.
د پاکولو او هوارولو له بشپړېدو وروسته، دغه سړک یو ځل بیا د تګ راتګ لپاره چمتو شوی او د سیمې د اوسېدونکو ستونزې حل شوې دي.
مسؤلین زیاتوي چې د دې لارې بیا پرانېستل د خلکو تګ راتګ اسانه کړی او د ترافیکي پېښو د احتمالي رامنځته کېدو مخه به ونیسي.
نېټه: ۱۴۴۷/۱۰/۲۷ هـ ق
له پېښو سره د مبارزې آمادګۍ ملي اداره
