د لوګر ولایت له پېښو سره د مبارزې آمادګۍ ریاست ۷ زیانمنو کورنیو ته خوراکي او غیرخوراکي مرستې ووېشلې
د لوګر ولایت له پېښو سره د مبارزې آمادګۍ ریاست، د کلیو د بیارغونې او پراختیا ریاست په همکارۍ، د وروستیو سېلابونو له امله د مرکز پلعلم اړوند بابوس او الوزي سیمو، او همدارنګه د محمدآغه ولسوالۍ مغل خېل سیمه کې ۷ زیانمنو کورنیو ته خوراکي او غیرخوراکي مرستې ووېشلې.
په دې بهیر کې د مسوولینو په شتون کې، له پېښو سره د مبارزې آمادګۍ ریاست له لوري هغو ۲ کورنیو ته چې کورونه یې په بشپړه توګه ویجاړ شوي وو، هرې یوې ته ۴ بورۍ غنم، ۲ تختې کمپلې، ۲ عدده لاسي څراغونه، یوه خېمه، ۲ ترپالونه، یو پلاستيکي مشکوله او یو د یونیسف روغتیايي کټ ووېشل شو. همدارنګه هغو ۵ کورنیو ته چې کورونه یې په نسبي توګه ویجاړ شوي وو، هرې یوې ته ۲ بورۍ غنم، ۵ تختې چینایي کمپلې، ۲ عدد لاسي څراغونه، یو د نیسف روغتیايي کټ او د اوبو د تصفیې ټابلیټونه ووېشل شول.د کلیو د بیارغونې او پراختیا ریاست له لوري هم هغو ۲ کورنیو ته چې کورونه یې په بشپړه توګه ویجاړ شوي وو، هرې یوې ته یوه خېمه، ۲ ترپالونه، یو پلاستيکي د اوبو بشکه او د اوبو د تصفیې ټابلیټونه ووېشل شول. او هغو ۵ کورنیو ته چې کورونه یې په نسبي توګه ویجاړ شوي وو، هرې یوې ته یوه تخته ترپال، یو پلاستيکي د اوبو بشکه او د اوبو د تصفیې ټابلیټونه ووېشل شول.
د یادونې وړ ده، چې د وروستیو بارانونو او سېلابونو له امله د یاد ولایت په مرکز او د محمدآغه او ازرې ولسوالیو کې تر ۲۰۰ زیات کورونه او زرګونه جریبه کرنیزه ځمکه ویجاړه شوې ده، چې د سیمې اوسېدونکو ته یې درانه مالي زیانونه اړولي دي. د زیانونو د سروې بهیر هم مهاله د مرستو له رسولو سره دوام لري.
نېټه: ۱۴۴۷/۱۰/۱۸ هـ ق
له پېښو سره د مبارزې آمادګۍ ملي اداره
