د میدان وردګو د جلرېز ولسوالۍ پر ۸۰ بېوزلو کورنیو د ۱.۴ مېلیونه افغانیو په ارزښت ژمنۍ مرستې ووېشل شوې
ریاست حوادث ـ میدان وردګ
۱۴۴۴/۶/۲
د میدان وردګو په جلرېز ولسوالۍ کې د سویډن کمېټې وردګ سیمه ییز دفتر د آبادۍ پروژې له لوري پر ۸۰ بېوزلو، اړمنو او د معلولیت لرونکو وګړو پر کورنیو ژمنۍ مرستې، چې ژمني د البسې کېټونه پکې شامل وو، ووېشل.
د دغې پروژې مالي لګښت چې د ملګرو ملتونو د پرمختیایي پروګرام له لوري ورکول کېږي، یادې ۸۰ کورنۍ د جلرېز ولسوالۍ په ۴۰ کلیو کې په پوره شفاف ډول انتخاب شوې او هرې کورنۍ ته د ۱۶ زره ۷ سوه افغانیو په ارزښت ۳۱ قلمه ژمني پوښاکي توکي ورکړل شول، چې مجموعي ارزښت یې ۱.۴ مېلیونه افغانیو ته رسیږي.
مرسته تر لاسه کوونکو کورنیو د مرستو له وېش خوښي څرګنده کړه او په نورو خیریه موسساتو یې غږ وکړ، چې د ژمي په ساړه موسم کې یې لاسنیوی وکړي.
د یادولو ده، چې اوونۍ وړاندې هم، یادې کمېټې د چک ولسوالۍ پر ۴۰ کورنیو همدغه ژمني کېټونه ووېشل.
