د میدان وردګ ولایت له پېښو سره د مبارزې آمادګۍ ریاست په نرخ ولسوالۍ کې یو نوی جوړ شوی پُل ګټې اخیستنې ته وسپاره

د میدان وردګ ولایت له پېښو سره د مبارزې آمادګۍ ریاست، د نرخ ولسوالۍ د ده خرقې په سیمه کې د یو پُل د جوړولو پروژه د دوه میلیونه او اووه سوه زره (۲,۷۰۰,۰۰۰) افغانیو په لګښت بشپړه کړه او رسماً یې ګټې اخیستنې ته وسپارله.
یاد پُل د ۱۳.۱ مترو په اوږدوالي، ۴ مترو په پلنوالي او ۳ مترو په لوړوالي جوړ شوی دی، او د دواړو غاړو په اوږدو کې یې د ۶۰ مترو په ټولیز اوږدوالي استنادي دیوالونه جوړ شوي دي.
د یاد پُل د پرانېستې مراسم د میدان وردګ ولایت والي، محترم الحاج ملا خیرالله خیرخواه، له پېښو سره د مبارزې آمادګۍ رئیس، مولوي فیض‌الله جلالي، د دولتي ادارو استازو، دیني عالمانو، قومي مشرانو او یو شمېر سیمه‌ییزو مسؤلینو په ګډون ترسره شول.
یاده پروژه د عالیقدر امیرالمؤمنین حفظه‌الله تعالی د ځانګړې لارښوونې او شفقت له مخې په نرخ ولسوالۍ کې منظوره شوې وه او له پېښو سره د مبارزې آمادګۍ ملي ادارې له بودجې څخه تمویل او پلي شوې ده.
د سیمې اوسېدونکو د دې پروژې له بشپړېدو څخه خوښي څرګنده کړه، له پېښو سره د مبارزې آمادګۍ ملي ادارې د لوی رئیس، محترم الحاج ملا نورالدین ترابي له هڅو یې مننه وکړه او د راتلونکې لپاره یې د نورو پراختیایي او بیړنیو پروژو د پلي کېدو غوښتنه وکړه.

نېټه: ۱۴۴۷/۰۵/۰۶ هـ ق
له پېښو سره د مبارزې آمادګۍ ملي اداره