د میدان وردګ ولایت په دایمیرداد ولسوالۍ کې د یوې لویې پروژې کار پیل شو
د میدان وردګ ولایت له پېښو سره د مبارزې آمادګۍ ریاست د دایمیرداد ولسوالۍ د "تنګي سیدانو" کلي د سیند د فرش د پاکولو پروسه پرانیسته. په دې مراسمو کې، د دې ولایت له پېښو سره د مبارزې آمادګۍ رییس؛ مولوي فیض الله جلالي د تخنیکي ټیم سره د پروژې ساحې ته سفر وکړ او پروژه د دولتي مسؤلینو، قومي مشرانو او ځایي اوسېدونکو په شتون کې پرانیستل شوه.
د یادونې وړ ده، چې د پروژې لپاره اړین ماشینونه د ملي دفاع وزارت د پنځمې پیاده لوا لخوا چمتو شوي او د پروژې تخنیکي برخه د میدان وردګ ولایت له پېښو سره د مبارزې آمادګۍ ریاست لخوا ترسره کیږي. ټاکل شوې ده چې پروژه د یوې میاشتې په اوږدو کې بشپړه شي او په دې پروژه کې د کارېدونکو ماشینونو لپاره د ۵,۰۰۰ ليټره تیلو چمتو کول هم له پېښو سره د مبارزې آمادګۍ ملي ادارې د لوی رییس، محترم الحاج ملا نورالدین ترابي لخوا منظور شوي دي.
د پرانیستنې د مراسمو په لړۍ کې، دولتي مسؤلینو، قومي مشرانو او ځایي اوسیدونکو د میدان وردګ ولایت له پېښو سره د مبارزې آمادګۍ ریاست د فعالیت ستاینه وکړه او له پېښو سره د مبارزې آمادګۍ ملي ادارې له عمومي رییس څخه یې د ماشینونو لپاره د سونګ توکو په برابرولو کې د همکارۍ کولو له امله مننه وکړه. دوی محترم ملا نورالدین ترابي د ملت یو ریښتینی خدمتګار او خادم وباله.
نېټه: ۱۴۴۷/٢/۲۹ هـ ق
له پېښو سره د مبارزې آمادګۍ ملي اداره
