د ننګرهار ولایت له پېښو سره د مبارزې آمادګۍ ریاست ۲۷۲ زلزله ځپلو کورنیو ته نغدې او غیر خوراکي مرستې ووېشلې

د ننګرهار ولایت له پېښو سره د مبارزې آمادګۍ ریاست د کډوالۍ نړیوال سازمان (IOM) په مالي او تخنیکي همکارۍ، د دې ولایت د کوټ، بټي کوټ، شینواري، اچین، سپین غر، لعل پوره، هسکه مینه، بهسود، پچیراګام ولسوالیو او مرکز جلال آباد ښار اړوند ۲۷۲ کورنیو ته چې د تېرو سېلابونو او وروستۍ زلزلې له امله زیانمنې شوې وې له سروې او ارزونې وروسته نغدې او غیر خوراکي مرستې ووېشلې.
په دې لړۍ کې د سیمه ییزو مسؤلینو په شتون کې له یاد شمېر کورنیو څخه ۲۶۷ کورنیو هرې یوې ته د ۱۳۰ ډالرو معادل ۸,۸۰۰ افغانۍ، چې ټولټال دوه میلیونه او درې سوه نه څلوېښت زره او شپږ سوه (۲,۳۴۹,۶۰۰) افغانۍ نغدې پیسې د یاد شمېر کورنیو لپاره ځانګړې شوې وې. همدارنګه، د ۲۶۷ کورنیو له جملې ۴۲ کورنیو ته چې کورونه یې زیات ویجاړ شوي وو، هرې کورنۍ ته یو باب خیمه او ۵ نورو کورنیو هرې یوې ته خیمې، کمپلې، د پخلنځي وسایل او سولري څراغونه ووېشل شول. 

نېټه: ۱۴۴۷/۰۳/۲۸ هـ ق
له پېښو سره د مبارزې آمادګۍ ملي اداره