د هرات ولایت د اسلامقلعه په پوله کې له ایران څخه د اجباري راستنېدونکو کډوالو د لنډمهالې هستوګنې لپاره د خیمو د درلو بهیر پیل شو
له ایران څخه په اجباري توګه د راستنېدونکو کډوالو د نوې څپې له پیل وروسته، د دغو کورنیو لپاره د لنډمهاله هستوګنې او استراحت ځای برابرولو په موخه، د هرات ولایت د اسلامقلعه په پوله کې د معیاري پنډغالي جوړولو لپاره د خېمو د درلو بهیر رسماً پیل شو.
دا اقدام، له پېښو سره د مبارزې آمادګۍ ملي ادارې د سرپرست، محترم الحاج ملا نورالدین ترابي، په لارښوونه، د سیمې له هموارولو او جغل اچولو وروسته، د مرکزي ادارې د عملیاتې ټیم له خوا ترسره شوی دی. ټاکل شوې چې دغه خیمې به په لومړنیو اسانتیاوو لکه، د څښاک پاکو اوبو، برېښنا، تشنابونو، حمام، د کثافاتو ځایونو او نورو اړینو اړتیاوو سره سمبالې شي.
له پېښو سره د مبارزې آمادګۍ ملي ادارې موظف ټیمونو د پولې د صفري نقطې په سیمه کې د خېمو د درلو چارې ژر تر ژره پیل کړې، ترڅو د سلګونو بېسرپناه کورنیو لپاره د لنډمهاله ځای پر ځای کېدو زمینه برابره کړي. دغه خیمې په لومړي ګام کې د ښځو، ماشومانو، سپینږیرو او له زیان سره د مخ کسانو لپاره په پام کې نیول شوې دي.
د سیمهییزو چارواکو په وینا، په دې وروستیو ورځو کې له ایران څخه د کډوالو د اجباري را اېستلو بهیر زور اخیستی او هره ورځ سلګونه کورنۍ په سختو شرایطو او پرته له لومړنیو امکاناتو هېواد ته راستانه کېږي. په داسې حال کې، د استراحت لپاره د مناسب ځای او د لومړنیو روغتیايي او خوراکي مرستو برابرول ډېر اهمیت لري.
د یادونې وړ ده، چې له پېښو سره د مبارزې آمادګۍ ملي ادارې تر دې وړاندې هم د هېواد د پولو په بېلابېلو سیمو، په ځانګړي ډول د ننګرهار ولایت په تورخم او د نیمروز ولایت د پل ابریشم په پوله کې، اجباري ایستل شویو کډوالو ته رسېدنې لپاره ورته اقدامات ترسره کړي دي.
نېټه: ۱۴۴۷/۰۱/۲۶ هـ ق
له پېښو سره د مبارزې آمادګۍ ملي اداره
