د هلمند ولایت په سنګین ولسوالۍ کې د ګبیوني دیوال جوړولو له پروژې څخه څارنه وشوه
د هلمند ولایت له پېښو سره د مبارزې آمادګۍ ریاست د سنګین ولسوالۍ د ساروان قلعه په سیمه کې د ګبیوني دیوال جوړولو له پروژې څخه څارنه وکړه. دا څارنه د هلمند ولایت له پېښو سره د مبارزې آمادګۍ ریاست د خطر د مخنیوي او کمولو مدیر له لوري د کور او ښار جوړونې ریاست د څارنې لوی مدیر په ملتیا وشوه.
د دې لیدنې په ترڅ کې، د پروژې کارونه له نږدې وڅارل شول، چې د وړاندې شویو معلوماتو له مخې ۳۸ سلنه فزیکي پرمختګ شوی دی. همدا راز، هغه نیمګړتیاوې چې په تېرې لېدنې کې په نښه شوې وې، اصلاح شوې دي او د کار د لاښه والي لپاره د پروژې د پلي کوونکي شرکت انجنیر ته د انجنیري د اصولو او معیارونو سره سم لازمې لارښوونې وشوې.
د یادونې وړ ده، چې له دې پروژې څخه په منظم ډول په اوونۍ کې یو یا دوه ځله څارنه کېږي ترڅو له کیفیت او معیاري پرمختګ څخه یې ډاډ ترلاسه شي.
نېټه:۱۴۴۷/۷/۰۲ هـ ق
له پېښو سره د مبارزې آمادګۍ ملي اداره
