د پاکستان حکومت د افغانستان لپاره د ۳۰ میلیونه ډالرو په ارښت د بشري مرستو ژمنه وکړه
کابل- 9 قوس 1400 / 24 ربیعالثانی 1443
ښاغلي غلام غوث ناصري پېښو ته د رسېدو په چارو کې د دولت وزارت مرستیال او سرپرست نن له غرمې وروسته په کابل کې مېشت د پاکستان جمهوریت سفیر منصور احمد خان سره لیدنه او د افغانستان سره د بشري مرستو په برخه کې د هغه هېواد په ژمنو خبرې وکړې.
لومړۍ ښاغلي ناصري په تېرو ۴۰ کالو کې د پاکستان جمهوریت سخاوتمندانه مرستې او د افغانستان په بیارغونې او بشري مرستو په برخه کې یې د هغه هېواد رول مهم وباله.
پېښو ته د رسېدو په چارو کې د دولت وزارت سرپرست د دواړو دوست هیوادونو د ګډ کلتور او دین څخه د یادونې ترڅنګ د ژمي په فصل کې د خلکو په زیانمنتوب خبرې وکړی او پاکستان جمهوریت له سفیر څخه د خوراکي او غیر خوراکي بشري مرستو او د کارکونکو د ظرفیت لوړلو په پار د روزنیزو پروګرامونو د ترسره کولو غوښتونکې شو.
ورته مهال منصور احمد خان په کابل کې مېشت د پاکستان جمهوریت سفیر وویل: د پاکستان هیواد د افغانستان اسلامی امارت ترڅنګ ولاړ دی او زیاته کړه چې پاکستان افغانستان ته د کلتوري، دیني او همدارنګه په جغرافیایي لحاظ نزدیکوالي له امله له ورته پېښو سره مخامخ و، او موږ په دی برخه کې د افغانستان د خلکو د درد احساس کولای شو او هغه پېښو ته د رسېدو په چارو کې د دولت وزیر ته د پاکستان حکومت له طرفه د ۳۰ میلیونه ډالرو په ارزښت د بشري مرستو ژمنه ورکړه.
په پای کې د پاکستان سفیر پېښو ته د رسېدو په چارو کې د دولت وزیر په نږدې راتلونکي کې د خوراکي مرستو ژمنه ورکړه او دواړو لورو دوو دوست هیوادونو په دوامداره همکاري او دوستي خبرې وکړې، او د پاکستان هیواد له افغانستان سره ۴۰ کلنې خدمتونو ته په اشارې سره د دواړو هیوادونو په دوامداره همکاري ټینګار وکړ.
