د پروان ولایت له پېښو سره د مبارزې آمادګۍ ریاست په سالنګ ولسوالۍ کې د سېلاب ځپلو ځایونو او زیانمنو لارو د پاکولو له چارو لیدنه او څارنه وکړه
د پروان ولایت له پېښو سره د مبارزې آمادګۍ ریاست، د یاد ولایت د سالنګ ولسوالۍ په بېلابېلو سیمو کې د وروستیو سختو بارانونو او سېلابونو له امله د زیانمنو شویو لارو او ځایونو د پاکولو له روانو چارو څخه لیدنه او څارنه وکړه.
د یاد ریاست مسئولینو د دغو پروژو د کیفیت، چټکتیا او د کاري پرمختګ د ارزونې په موخه، د سالنګ ولسوالۍ له هغو سیمو څخه لیدنه وکړه چې پکې د پاکولو چارې روانې دي. د څارنې پر مهال مسؤلینو ته د چارو د لا ښه تطبیق، د کیفیت په پام کې نیولو او د کار د چټکتیا په اړه لازمې لارښوونې هم وشوې.
اوس مهال د سالنګ ولسوالۍ د للمه سلطان کلي په فرعي سړک کې د وروستیو سېلابونو له امله د راغلو خټو، ډبرو، د غره د ښویدنې له امله د رامنځته شویو رسوباتو او نورو خنډونو د پاکولو چارې په منظم ډول روانې دي، ترڅو د سیمې د اوسېدونکو پر مخ د تګ راتګ اسانتیاوې بېرته برابرې شي او د راتلونکو احتمالي خطرونو مخنیوی وشي.
د پروان ولایت له پېښو سره د مبارزې آمادګۍ ریاست وایي، چې زیانمنو شویو سیمو ته پر وخت رسېدنه، د سیمې د اوسېدونکو بیړنیو اړتیاوو پوره کول او د ستونزو د حل لپاره به خپلې هڅې لا پیاوړې او دوامداره وساتي، ترڅو د قدرتي پېښو ناوړه اغېزې راکمې او د خلکو ژوند او شتمنۍ خوندي شي.
