د پیښو چارو د همغږۍ معین په میدان وردګ ولایت کې د دوو مهمو پروژو د جوړولو له بهیر څارنه وکړه

له پیښو سره د مبارزې آمادګۍ ملي ادارې د پیښو چارو د همغږۍ معین، محترم الحاج ملا عبدالولي څارنوال (حاجي وارث)، میدان وردګ ولایت ته د خپل رسمي سفر په جریان کې، د دې ولایت له پیښو سره د مبارزې آمادګۍ رییس، محترم الحاج مولوي فیض الله جلال سره یوځای، د دوو مهمو عامه المنفعه پروژو د جوړولو او پلي کولو څارنه او بیالیدنه وکړه.
په دې سفر کې، د پیښو چارو د همغږۍ معین لومړی د نرخ ولسوالۍ د ده خرقه په کلي کې د پل د جوړولو له پروژې لیدنه وکړه. دا پل، چې د معیاري تخنیکونو سره سم د جوړېدو په حال کې دی، د ۱۳ مترو په اوږدوالي، ۴ مترو په عرض او ۳.۱ مترو په لوړوالي سره به جوړ شي او ټول ارزښت یې ۱۰۰۰،۰۰۰ (یو ملیون) افغانیو ته رسیږي. د دې پروژې پلي کول به د کلي او شاوخوا سیمو اوسیدونکو ته د سیمه ییز ترانسپورټ او تګ راتګ په برخه کې د پام وړ اسانتیاوې برابرې کړي.
همدارنګه، د پیښو چارو د همغږۍ معین د میدان وردګ ولایت له پیښو سره د مبارزې آمادګۍ ریاست د اداري ودانۍ د جوړولو پروژې څخه لیدنه وکړه. دا ودانۍ په دریو پوړونو کې جوړیږي او ټول ارزښت یې ۱۳،۰۰۰،۰۰۰ (دیارلس میلیونه) افغانۍ اټکل شوی دی. د دې ودانۍ په بشپړېدو سره به د دې ولایت خلکو ته د چټکو او اغیزمنو خدماتو د وړاندې کولو لپاره اړین اداري امکانات او اسانتیاوې برابرې شي.
محترم ملا عبدالولي څارنوال (حاجي وارث) خپلې څارنې په جریان کې، ټینګار وکړ چې له پیښو سره د مبارزې آمادګۍ ملي اداره د ولایت په کچه د زیربناوو او خدماتو پروژو پلي کولو ته ژمنه دی او هڅه کوي چې د معیاري پروژو په پلي کولو سره خلکو ته د غوره خدماتو او د طبیعي پیښو د قربانیانو د پاملرنې لپاره مناسب امکانات چمتو کړي.
د پروژې د چارواکو څخه د مفصل راپور ترلاسه کولو وروسته، د پیښو چارو د همغږۍ معین د پروژې په شفاف، ګړندي او معیاري پلي کولو ټینګار وکړ او سپارښتنه یې وکړه، چې د پروژې د پیاوړتیا او پایښت ډاډمن کولو لپاره د کیفیت لرونکي موادو څخه کار واخیستل شي. 
د یادونې وړ ده، چې دواړه پورته ذکر شوي پروژې د پلي کېدو په حال کې دي او د کاري پلان سره سم پرمخ روانې دي. 

نیټه: ۱۴۴۷/٣/۱۱ هـ ق
له پیښو د مبارزې آمادګۍ ملي اداره