د پېښو چارو د همغږۍ معین د دایکندي ولایت له پېښو سره د مبارزې آمادګۍ ریاست څخه څارنه وکړه او د دې ولایت له والي سره یې وکتل
تېره ورځ چهارشنبه، له پېښو سره د مبارزې آمادګۍ ملي ادارې د پېښو چارو د همغږۍ معین، محترم الحاج ملا عبدالولي څارنوال (حاجي وارث)، د یو تخنیکي، فني او مسلکي پلاوي په مشرۍ، د هېواد ته ولایتونو ته د رسمي سفر په دوام، له لغمان، نورستان، کونړ، ننګرهار، بامیان او غور ولایتونو څخه د لیدنو وروسته، دایکندي ولایت ته ورسېد.
په پیل کې، د پېښو چارو د همغږۍ محترم معین د یاد ولایت له پېښو سره د مبارزې آمادګۍ رئیس، الحاج مولوي حبیبالله رهنما او د خپل مل پلاوي په شتون کې د دایکندي له والي، محترم الحاج مولوي نجیبالله رفیع سره وکتل.
په دې ناسته کې، د پېښو چارو د همغږۍ محترم معین د نورو ولایتونو د سفرونو یادونه وکړه او د سفر موخه یې له پېښو سره د مبارزې آمادګۍ ریاستونو د عمومي وضعیت څېړل، د اسلامي امارت د عالي مقام مشرتابه د فرمانونو، احکامو او مکتوبونو د پلي کېدو څارنه، د مالي او اداري چارو ارزونه، د هوکړه لیکونو د پلي کېدو څارنه، د وقایوي پروژو ارزونه، د بشردوستانه مرستو د وېش تعقیبول، د ماین پاکۍ، د نشراتو چارو او همدارنګه د موجودو ستونزو او وړاندیزونو اورېدنه وبلله.
هغه ټینګار وکړ چې له پېښو سره د مبارزې آمادګۍ ملي اداره ژمنه ده چې د خپلو قانوني صلاحیتونو او دندو په چوکاټ کې به د وقایوي پروژو د پلې کېدو، د زیانمنو بېړنیو اړتیاوو د پوره کولو او د طبیعي پېښو او خطرونو د مدیریت د ښه والي په برخه کې هر اړخیزه همکاري وکړي.
وروسته د دایکندي والي، الحاج مولوي نجیبالله رفیع، د زیانمنو په برخه کې د یادې ادارې له هڅو او رسېدنې څخه د قدردانۍ ترڅنګ، د ولایت د جغرافیوي موقعیت او د سختو لارو یادونه وکړه او ویې ویل چې د دایکندي خلک د طبیعي پېښو او بېوزلۍ له امله په لوړه کچه زیانمن دي او د بشردوستانه مرستو، وقایوي پروژو او د موسسو د همکاریو د جلب اړتیا لري تر څو د خلکو ستونزې حل شي.
د ناستې په پای کې، د پېښو چارو د همغږۍ معین، محترم الحاج ملا عبدالولي څارنوال، ژمنه وکړه چې ټولې ستونزې او وړاندیزونه به د امیرالمؤمنین حفظهالله له عالي مقام، د ریاستالوزراء له محترم مقام او له پېښو سره د مبارزې آمادګۍ ملي له مرکزي دفتر سره شریک کړي.
ورپسې یاد پلاوي د دایکندي ولایت له پېښو سره د مبارزې آمادګۍ ریاست څخه لیدنه وکړه او د دې ریاست د چارو بهیر یې له نږدې وڅېړه. د لیدنې پر مهال، د پېښو چارو د همغږۍ معین له رئیس او کارکوونکو سره خبرې وکړې، د دوی ستونزې او وړاندیزونه یې واورېدل، او د اسنادو او فعالیتونو د ارزونې ترڅنګ یې کارکوونکي د دندو د لایحې پر بنسټ د چټکو، پر وخت او اغېزمنو خدماتو وړاندې کولو ته وهڅول.
یاد پلاوي په دغه ریاست کې خپل څارنیز او رهنمودي بهیر پیل کړ.
نېټه: ۱۴۴۷/۳/۴ هـ ق
له پېښو سره د مبارزې آمادګۍ ملي اداره
