د کابل ولایت له پېښو سره د مبارزې آمادګۍ ریاست په کلکان ولسوالۍ کې یو ګبیوني دېوال ګټې اخیستنې ته وسپاره
د کابل ولایت له پېښو سره د مبارزې آمادګۍ ریاست د کلکان ولسوالۍ په قچي کلي کې د ۱۲۵ متره په اوږدوالي، ۲ متره پلنوالي او ۳ متره لوړوالي د یو ګبیوني دیوال د جوړولو کار بشپړ کړ او رسمآ یې پرانیست.
دا پروژه له پېښو سره د مبارزې آمادګۍ ملي ادارې له لوري د اته سوه او یو اتیا زره او پنځه سوه او لس (۸۸۱,۵۱۰) افغانیو په لګښت تمویل شوې او د قراردادي شرکت له خوا بشپړه شوې، چې د دې ګبیوني دیوال په ګټې اخیستو سره به د سیمې اوسېدونکي په راتلونکې کې د سیلابونو له خطر څخه خوندي وي.
د پرانېستې مراسم د کابل ولایت له پېښو سره د مبارزې آمادګۍ رئیس، الحاج مولوي نجیبالله انوري، د کلکان ولسوال مرستیال، د ملکصاحبانو، د سیمې سپینږیرو او ځوانانو په شتون کې ترسره شول.
د کلي اوسېدونکو د دې پروژې له بشپړیدو خوښي څرګنده کړه او د اسلامي امارت او له پېښو سره د مبارزې آمادګۍ ملي ادارې له مشرتابه، په ځانګړي توګه د کابل ولایت له پېښو سره د مبارزې آمادګۍ ریاست څخه قدرداني وکړه.
نېټه: ۱۴۴۷/۴/۱۱ هـ ق
له پېښو سره د مبارزې آمادګۍ ملي اداره
